Станува збор за гасоводот преку кој рускиот природен гас стигнува до Унгарија. Медиумите известуваат дека српската полиција и армија, со помош на дронови и хеликоптери, го пребаруваат подрачјето околу Кањижа во потрага по други „забранети супстанции“ што би можеле да го загрозат населението и клучната инфраструктура.
Овој настан би можел значително да влијае на унгарската изборна кампања. Изборите се одржуваат следната недела, на 12 април, а според анкетите партијата Фидес на Орбан, која е на власт повеќе од 16 години, заостанува зад опозициската партија Тиса на Петер Маѓар.
Уште во февруари Орбан ги зајакна безбедносните мерки околу енергетската инфраструктура на земјата. Неговата партија се обидува да го прикаже Маѓар како пион на Брисел и Украина, тврдејќи дека гласањето за Тиса е „глас за тенкови и војна“. Во позадина е актуелниот спор меѓу Орбан и режимот во Киев во врска со испораката на нафта преку нафтоводот Дружба, кој делумно поминува низ украинска територија.
Сè уште не е јасно што точно се крие зад откривањето на експлозивите. Унгарскиот истражувачки новинар Саболч Панји на социјалната мрежа Икс изрази сомневање дека тоа би можело да биде инсценирана акција.
„Она од што сите се плашевме се случува. Унгарскиот експерт за Русија Андраш Рач пред три дена напиша за можен лажен напад во Србија, кој би бил поддржан од Русија, а би бил насочен кон гасоводот до Унгарија“, напиша Панји.
💥What we’ve all feared is happening: Hungarian Russia expert András Rácz wrote three days ago about a potential Russia-backed false flag attack in Serbia targeting the gas pipeline to Hungary. The same information had already reached multiple journalists, including myself, weeks… pic.twitter.com/9eR4JmjFdX
— Szabolcs Panyi (@panyiszabolcs) April 5, 2026
Тој изрази страв дека Орбан би можел да прогласи вонредна состојба, што значително би влијаело на кампањата и одржувањето на изборите.
Лажна операција (false flag) е ситуација во која некој извршува напад или акција, но се обидува да прикаже дека некој друг го сторил тоа.
Унгарскиот опозициски лидер Петер Маѓар се огласи на Фејсбук, нарекувајќи ги настаните во Србија провокација.
Тој му порача на Орбан дека нема да може да ги спречи изборите следната недела. Според него, ако Орбан и провладините медиуми го искористат овој инцидент во својата кампања, тоа ќе биде јасен доказ дека станува збор за однапред планирана лажна операција.
„Со недели добиваме информации од различни извори дека Виктор Орбан, по претходните неуспешни лажни операции и поради падот на поддршката за Фидес, е подготвен да преземе нови чекори со српска и руска помош“, тврди Маѓар.
Тој додаде дека неколку луѓе јавно навестиле дека нешто „случајно“ ќе се случи на гасоводот за време на Велигден во Србија, точно една недела пред унгарските избори.
Маѓар го повика Орбан да престане да „шири паника“ и да „предизвикува немири“, за кои тврди дека биле смислени од неговите руски советници, а во исто време го повика Орбан да го покани на седницата на Советот за одбрана.
