Гулјас наведе дека самитот на ЕУ ќе се одржи во Брисел следната недела, но дека министрите за внатрешни работи и правда веќе донеле одлука за распределбата на мигрантите, што го одредува и бројот и капацитетот за Унгарија, пренесува агенцијата МТИ.
„Сепак, Унгарија нема да го спроведе миграцискиот пакт и нема да прими ниту еден мигрант“, истакна Гулјас.
Враќајќи се од Истанбул, унгарскиот премиер Виктор Орбан им кажа на новинарите во понеделникот дека прашањата поврзани со миграцијата ќе бидат во фокусот на следните унгарски избори, закажани за април 2026 година.
„Дали ќе се спротивставиме и ќе се побуниме против одлуката на Брисел, или унгарските политички партии ќе се потчинат на притисокот од ЕУ, ќе ја прифатат нивната одлука и ќе им дозволат на мигрантите да влезат во Унгарија од Запад“, кажа Орбан, според унгарска новинска агенција.
Неколку часа претходно Орбан објави на Фејсбук дека Унгарија нема да го спроведе миграцискиот договор на ЕУ.
