Висок американски функционер изјавил за Фајненшл тајмс дека се очекува трилатерален состанок да се одржи во петок, 23 јануари и сабота, 24 јануари во Абу Даби, главниот град на Обединетите Арапски Емирати. Кабинетот на претседателот на Украина истакнал дека трилатералниот состанок сè уште не е целосно потврден и дека украинската и американската страна чекаат одговор од Русија.
Форматот кој наводно се предлага е сличен на разговорите одржани во Абу Даби минатиот ноември, кога украинските и руските преговарачи се сретнаа одделно со американските претставници, но не комуницираа директно.
САД и Украина разговарале за предлог за ограничено примирје со Русија, според кое Москва би ги запрела нападите врз енергетската инфраструктура во замена за прекин на нападите врз руските рафинерии за нафта и танкерите кои ја сочинуваат „флотата во сенка“ од страна на Киев.
Извор на Фајненшл тајмс изјавил дека разговорите со Русија за овој предлог не се во напредна фаза, додавајќи дека е малку веројатно Путин да се согласи бидејќи смета дека притисокот врз енергетската инфраструктура на Украина е важен лост за влијание.
Висок украински функционер изјавил за весникот дека Украина, исто така, се двоуми за енергетско примирје бидејќи нејзината програма за беспилотни летала со долг дострел успешно ги таргетирала руските нафтени и гасни објекти како и санкционираните танкери. Претходно, украинскиот претседател Володимир Зеленски изјави дека се очекуваат трилатерални разговори меѓу Украина, САД и Русија во Обединетите Арапски Емирати во петок и сабота.
