Ердоган присуствува на Генералното собрание на Обединетите нации во Њујорк оваа недела, пред да се сретне во Белата куќа во четврток со американскиот претседател Доналд Трамп, кој кажа дека очекува за време на посетата да бидат склучени трговски и воени договори.
Укинувањето на царините, кои кога беа воведени опфаќаа производи како патнички автомобили, овошје, ориз, тутун, алкохолни пијалаци, цврсти горива и хемиски производи, беше објавено во Службениот весник на Турција.
Минатиот месец, Трамп воведе царини од 15 отсто за Турција.
Откако се врати во Белата куќа претходно оваа година, Трамп воведе широки царини во обид да ја преобликува глобалната трговија во корист на Вашингтон, целејќи не само традиционални соперници, туку и долгогодишни сојузници.
Во август, САД воведоа царина од 15 отсто за увоз од Турција. Анкара не одговори на тој потег. Повлекувањата на контрамерките за царините се однесуваат на давачките воведени во 2018 година како одговор на американските царини за увоз на челик и алуминиум воведени за време на првиот мандат на Трамп.
Ердоган последен пат го посети Трамп во Белата куќа во 2019 година, а двајцата повремено имаа затегнати односи. Иако имаа блиски лични врски за време на првиот мандат на Трамп, тоа беше и период на затегнати билатерални односи поради споровите околу врските на Вашингтон со курдските борци во Сирија и односите на Анкара со Москва.
Во 2019 година, Турција ја налути администрацијата на Трамп со купувањето руски системи за ракетна одбрана С-400. Како одговор, Вашингтон ја откажа планираната продажба на борбени авиони Ф-35 на Турција и ја исклучи од заедничката програма за производство на авионите.
Турското министерство за трговија соопшти дека царините воведени во 2018 година последователно биле ажурирани врз основа на мерките преземени од страните, но останале на сила до одреден степен, без да даде информации за тековниот опсег на царините.
„Дополнителните финансиски обврски наметнати за увоз на одредени производи од американско потекло се укинати“, соопшти министерството, наведувајќи го напредокот во преговорите со САД.
Се додава дека Турција ќе продолжи да работи кон исполнување на актуелната цел од 100 милијарди долари годишна двонасочна трговија со САД. Обемот на трговијата меѓу двете земји минатата година изнесуваше приближно 30 милијарди долари.
„Ќе продолжиме да развиваме политики за зголемување на трговските односи во корист на двете страни, да ги диверсифицираме земајќи ги предвид конкурентските услови и да развиваме нови области на соработка“, беше нагласено.
Турција денес објави и дека вовела дополнителни царини од 25 до 30 отсто за увоз на патнички автомобили, со исклучок на Европската Унија и земјите со кои Турција има договори за слободна трговија.
