Романија испратила свои борбени авиони, откако руски дрон, како што тврдат властите на таа земја, го нарушил нивниот воздушен простор за време на руски напад врз украинската инфраструктура во близина на границата.
На територијата на Романија, земја членка на Европската Унија и НАТО, која дели граница од 650 километри со Украина, за време на конфликтот во Украина неколку пати паднаа парчиња од руски беспилотни летала.
Романците денес испратиле два борбени авиони Ф-16 и ги предупредиле граѓаните во југоисточната покраина Тулча, во близина на Дунав и украинската граница, да се засолнат, соопшти Министерството за одбрана.
Министерството додаде дека авионите откриле дрон во националниот воздушен простор и го следеле сè додека не исчезнал од радарот 20 км југозападно од селото Чилија Вече.
„Дронот не леташе над населени места и не претставуваше непосредна опасност за населението“, се вели во соопштението.
Се огласи и полскиот премиер Доналд Туск.
„Поради заканата од руски беспилотни летала што дејствуваат над Украина во близина на полската граница, авиони – полски и сојузнички – се распоредени во полскиот воздушен простор како мерка на претпазливост. Земјените системи за воздушна одбрана се ставени на највисока тревога“, кажа Туск.
Тревогата доаѓа откако повеќе руски беспилотни летала влегоа во полскиот воздушен простор во средата, по што НАТО испрати борбени авиони да ги соборат, нагласувајќи ја долгогодишната загриженост за можно проширување на повеќе од тригодишната војна на Русија во Украина.
Жителите на неколку области во регионот Лублин добија итно предупредување од Центарот за владина безбедност за можна закана од воздух. „Постои опасност од воздушни напади. Бидете особено внимателни и следете ги упатствата на службите. Очекувајте дополнителни најави“, се вели во предупредувањето испратено до жителите на неколку области.
BREAKING: Sirens sounding in Swidnik, Poland as mobile alert issued for threat of Russian drones entering airspace. pic.twitter.com/uTBLOJWiS0
— AZ Intel (@AZ_Intel_) September 13, 2025
Според најновите информации, во градот Швидник се огласиле сирени, што дополнително ја потврдува сериозноста на ситуацијата.
Оваа безбедносна мерка доаѓа во време кога Русија и Белорусија спроведуваат воени вежби Запад-2025, а на руската и белоруската граница се забележани зголемени воени активности.
Овој превентивен чекор од страна на полските власти доаѓа како директна реакција на неодамнешниот инцидент со беспилотни летала кои го нарушија полскиот воздушен простор, што предизвика сериозна загриженост за безбедноста на членката на НАТО што граничи со Украина.
Затворањето на аеродромот во Лублин, град кој се наоѓа релативно блиску до украинската граница, дополнително ја покажува сериозноста на ситуацијата и подготвеноста на полските власти да преземат сите потребни мерки за заштита на нивната територија и граѓаните од потенцијални закани.
НАТО во петокот објави планови за зајакнување на одбраната на источниот дел на Европа, откако Полска собори беспилотни летала што го нарушија нејзиниот воздушен простор.
Романските пратеници претходно оваа година одобрија закон кој ѝ дозволува на војската да соборува беспилотни летала што го нарушуваат романскиот воздушен простор во мирно време, врз основа на нивото на закана и ризик по човечкиот живот и имотот, но законот сè уште нема дозвола за спроведување.
