Десет дена пред американско-израелските напади врз Иран да го турнат регионот во војна, Трамп во Вашингтон беше домаќин на конференција на која заливските арапски држави ветија милијарди за управување и обнова на Газа по двегодишното израелско разурнување.
Планот предвидува обемна обнова на крајбрежниот појас по разоружувањето на палестинската милитантна група Хамас, чии напади врз Израел ја поттикнаа војната во Газа, и по повлекувањето на израелските трупи.
Ветените средства исто така се наменети за финансирање на активностите на новоформираниот Национален комитет за управување со Газа (НЦАГ), група палестински технократи поддржани од САД, која треба да ја преземе контролата над Газа од Хамас.
Одборот за мир во петокот во објава на социјалните мрежи, по објавувањето на текстот на Ројтерс, негираше дека има проблеми со финансирањето.
„Одборот за мир е мала организација насочена кон спроведување, која обезбедува средства по потреба. Не постојат ограничувања во финансирањето. Досега сите барања за финансирање веднаш и целосно биле исполнети“, се наведува.
Претставниците на НЦАГ не одговорија веднаш на барањата за коментар.
Еден од изворите, лице со директни сознанија за работата на Одборот за мир, изјави дека од десет земји што ветиле средства, само три – Обединетите Арапски Емирати, Мароко и самите САД – навистина уплатиле средства.
Изворот рече дека досега се собрани помалку од една милијарда долари, но не даде дополнителни детали. Војната со Иран „влијаеше на сè“, влошувајќи ги претходните тешкотии со финансирањето, рекол изворот.
НЦАГ не може да влезе во Газа поради проблеми и со финансирањето и со безбедноста, додаде тој. Дури и по договорениот прекин на огнот минатиот октомври, во израелските напади се убиени најмалку 700 луѓе во Газа, според тамошните здравствени служби, додека во нападите на милитантите биле убиени, според Израел, четворица нивни војници.
Друг извор, палестински функционер запознаен со ситуацијата, изјави дека одборот го известил Хамас и другите палестински фракции дека НЦАГ во моментов не може да влезе во Газа поради недостиг од средства.
„Во моментов нема достапни пари“, нагласил изворот, цитирајќи го пратеникот на одборот Николaj Младенов, кој за тоа ги известил палестинските групи.
Хамас повеќепати истакна дека е подготвен да му го предаде управувањето на НЦАГ.
Обновата на Газа, каде што четири петтини од зградите се уништени за време на двегодишното израелско бомбардирање, се проценува според глобалните институции на околу 70 милијарди долари.
