Во објава на неговата социјална мрежа Трут соушал Трамп наведе дека Кина испратила „екстремно непријателско писмо до светот“ и вовела „масовни контроли на извозот на речиси секој производ што го произведува“.
Трамп предупреди дека новите царини ќе стапат на сила на 1 ноември и најави дека Соединетите Американски Држави ќе воведат и контрола на извозот на својот клучен софтвер за Кина.
„Врз основа на фактот дека Кина ја зазеде оваа невидена позиција и зборувајќи само за САД, а не за други слично загрозени нации, почнувајќи од 1 ноември 2025 година (или порано, во зависност од понатамошните дејства или промени кои ќе ги преземе Кина), Соединетите Американски Држави ќе воведат царина од 100 отсто за Кина, покрај сите царини што моментално ги плаќа“, напиша Трамп.
„Невозможно е да се поверува дека Кина би презела таква акција, но тие го направија тоа, а останатото е историја“, додаде тој.
Претходно денес Трамп го нападна кинескиот лидер Си Џинпинг на социјалните мрежи поради зголемените напори на Кина да воведе контрола на извозот на клучните ретки минерали. Тој се закани со економски контрамерки и рече дека повеќе не гледа причина да се сретне со Си за време на планираната посета на регионот подоцна овој месец.
Трамп се закани и со економски санкции против Кина: „Во зависност од тоа што Кина ќе каже за непријателската „одлука“ која тукушто ја донесоа, ќе бидам принуден, како претседател на Соединетите Американски Држави, финансиски да возвратам на нивниот потег“.
„За секој елемент што успеаја да го монополизираат, ние имаме два“, додаде тој.
Вчера, Пекинг ги зајакна широките ограничувања за извозот на ретки минерали и ја прошири листата на минерали под контрола. Воведени се и ограничувања поврзани со нивните технологии за производство и нивната употреба во странство, вклучително и за воена и полупроводничка намена. Овој потег е насочен кон сериозната слабост на Соединетите Американски Држави – поради што во последните месеци се прават значителни напори од страна на администрацијата на Трамп за идентификување и брзо зголемување на капацитетот за рударство и производство.
Според неколку претставници на администрацијата, потегот веднаш предизвикал тревога во администрацијата на Трамп.
Потегот следи откако Пекинг се обиде да го зголеми своето влијание во трговските разговори со Соединетите Американски Држави и пред очекуваната средба меѓу Си и Трамп на маргините на самитот на АПЕК во Јужна Кореја подоцна овој месец.
Некои претставници на администрацијата го сметаат ова за јасен обид на Си да обезбеди преговарачка предност пред планираната средба лице в лице со Трамп, додека други посочуваат на мерките за контрола на извозот на САД кои можеа да предизвикаат кинески одговор.
