Ова е целосен пресврт на ставот на Трамп, бидејќи претходно беше многу скептичен кон перспективите на Украина и го критикуваше украинското раководство предводено од претседателот Володимир Зеленски, додека кон рускиот претседател Владимир Путин покажуваше значително поголема наклонетост.
„Кога ја запознав и целосно ја разбрав воената и економската ситуација на Украина и Русија и кога ги видов економските проблеми кои се создаваат за Русија, мислам дека Украина, со поддршка на Европската Унија, е во позиција да се бори и да ја врати цела Украина во нејзината оригинална форма. Со време, трпение и финансиска поддршка од Европа, а особено од НАТО, оригиналните граници од каде што започна оваа војна се многу добра опција. Зошто да не? Русија води бесмислена војна три и пол години во која на вистинска воена сила би ѝ требало помалку од една недела за да ја добие. Тоа не е комплимент за Русија. Всушност, ги прави да изгледаат како „тигар од хартија“.
Кога луѓето во Москва и сите големи градови, места и области низ цела Русија ќе дознаат што навистина се случува во оваа војна – фактот дека е речиси невозможно да се дојде до бензин поради долгите редици и сите други работи што се случуваат во нивната воена економија, каде што ги трошат поголемиот дел од своите пари борејќи се против Украина, која има одличен дух и станува сè подобра – Украина ќе може да ја врати својата земја во нејзината оригинална форма и, којзнае, можеби и повеќе! Путин и Русија се во големи економски проблеми и сега е моментот Украина да дејствува. Како и да е, им посакувам на двете земји се најдобро. Ќе продолжиме да го снабдуваме НАТО со оружје за да може НАТО да прави што сака со тоа оружје. Среќно на сите!
Доналд Џ. Трамп, претседател на Соединетите Американски Држави“.
After getting to know and fully understand the Ukraine/Russia Military and Economic situation and, after seeing the Economic trouble it is causing Russia, I think Ukraine, with the support of the European Union, is in a position to fight and WIN all of Ukraine back in its…
— Trump Truth Social Posts On X (@TrumpTruthOnX) September 23, 2025
Трамп ја објави оваа порака откако се сретна со украинскиот претседател Володимир Зеленски во Њујорк по говорот на Генералното собрание на ОН. За време на таа средба, Трамп како ретко кога ја пофали Украина, го нарече Зеленски „одличен човек“ и рече дека води „пеколно добра борба“.
„Имаме големо почитување за борбата што ја води Украина, всушност е прилично неверојатна“, кажа Трамп.
Тој им кажа на новинарите и дека НАТО треба да соборува руски авиони ако влезат во воздушниот простор на членовите на западниот воен пакт, додека на прашањето дали САД ќе го поддржат тоа тој кажа дека „зависи од околностите“.
