Американски борбен авион беше соборен денес над Иран, објавија иранските државни медиуми, а три американски извори го потврдија тоа, објави американската телевизиска мрежа Си-ен-ен.
Според иранските извештаи станува збор за невидлив ловец Ф-35, но анализа на Си-ен-ен на објавените фотографии од остатоците укажува дека станува збор за ловец Ф-15.
Американските војници спроведуваат спасувачка операција, изјавија извори за Си-ен-ен, додавајќи дека еден од двајцата пилоти е спасен.
Два од трите извори тврдат дека пилотот е жив, дека е кај Американците и добива медицинска помош.
Спасувањето се чини дека е снимено на видео објавено на социјалните мрежи и геолоцирано од Си-ен-ен на локација околу 470 километри јужно од Техеран. Може да се види ниско прелетување на борбени авиони и хеликоптерите.
Иранските медиуми тврдат дека авионот бил соборен од Иранската револуционерна гарда.
Иранската државна агенција Тасним објави дека потрагата по пилотите е „засега неуспешна“.
Друга иранска новинска агенција Фарс њуз објави дека властите понудиле награда за секој што ќе зароби „непријателски пилот или пилоти“.
Втор борбен авион на американските воздухопловни сили бил урнат денес во регионот на Персискиот Залив, а неговиот единствен пилот потоа бил спасен, објави Њујорк тајмс, повикувајќи се на двајца американски претставници.
Ирански систем за воздушна одбрана погодил непријателски авион А-10 во јужните води во близина на Ормускиот теснец, објавија државните медиуми во земјата, пренесува Ројтерс.
