„Веќе се испраќаат“, им рече Трамп на новинарите во воената база Џоинт бејз Ендрус во Мериленд, одговарајќи на прашање за испораката на ракетите „патриот“ и друга опрема. „Тие се испраќаат од Германија, а потоа Германија повторно ги дополнува залихите. И во сите случаи, САД добиваат целосна исплата.“
Објавата доаѓа во време кога Украина бара од своите сојузници, особено од САД, дополнителни системи за воздушна одбрана поради зголемените руски напади врз украинските градови.
Портпаролот на германската влада изјави на 14 јули дека европските сојузници се во преговори за испраќање повеќе од три системи „патриот“ во Украина.
Трамп објасни дека овие пратки се дел од нов договор во кој членките на НАТО и Европската Унија купуваат системи за оружје произведени во САД, испраќаат дел во Украина, а потоа ги заменуваат преку договор со Вашингтон. „Секогаш ги добиваме нашите пари назад, во целост“, додаде Трамп. „Во некои случаи, земјите-членки на Европската Унија директно ни ги надоместуваат трошоците.“
Новите испораки на оружје доаѓаат само два дена откако Трамп издаде ултиматум до Москва, предупредувајќи дека САД ќе воведат „строги“ царини доколку Русија не се согласи на мировен договор во рок од 50 дена за прекин на војната во Украина.
Кремљ претходно ги нарече предложените царини сериозни, велејќи дека на Москва ѝ е потребно време да ја анализира пораката од Вашингтон.
Американскиот претседател, исто така, истакна дека не разговарал со рускиот претседател Владимир Путин откако САД воведоа нови санкции врз Русија на 14 јули.
Коментарите на Трамп ја одразуваат се поголемата фрустрација поради, како што тој вели, одбивањето на Русија сериозно да им пристапи на мировните преговори. Тој претходно тврдеше дека може да ја заврши војната „во рок од 24 часа“ и повторно се дистанцира од конфликтот велејќи: „Тоа не е моја војна. Тоа е војна (на поранешниот американски претседател Џо) Бајден. Се обидувам да ве извлечам од неа“.
„Разочаран сум од претседателот Путин“, додаде Трамп. „Мислев дека ќе имаме договор пред два месеци, но се чини дека тоа не се случува“.
