Трамп оцени дека Обединетите нации „не биле тука“ кога САД морале да решаваат конфликти низ целиот свет. Сепак, призна дека организацијата има „огромен потенцијал“, но дека не го користи целосно.
Поточно, тој предупреди дека „неконтролираните миграции“ се „клучниот проблем на нашето време“, обвинувајќи ги Обединетите нации дека го финансираат процесот со своите програми.
Зборувајќи за кризата во Газа Трамп кажа дека „е потребно веднаш да се запре војната“ и да се ослободат сите дваесет заложници. Хамас, според него, ги отфрлил „разумните понуди за мир“, а признавањето на палестинска држава би било, како што рече, „премногу голем подарок за Хамас“. Додаде дека мир може да се постигне само ако светот се обедини зад ослободувањето на заложниците, пренесува Ројтерс.
„Како да сакаат да го охрабрат продолжувањето на конфликтот, некои од ова тело се обидуваат еднострано да ја признаат палестинската држава. Тоа би била преголема награда за терористите на Хамас, за нивните злосторства“, оцени Трамп.
Коментирајќи ја војната во Украина, Трамп кажа дека „тоа не ѝ носи добар имиџ на Русија“. Тој додаде дека сè уште има земји како Кина и Индија кои го финансираат конфликтот, додека сојузниците на НАТО не го намалиле значително увозот на руска енергија.
„Во случај Русија да не е подготвена да постигне договор за прекин на војната, Соединетите Американски Држави се целосно подготвени да воведат многу силен пакет царини, што верувам дека многу брзо би го запрело крвопролевањето“, кажа тој.
Сепак, за мерките да бидат ефикасни, додаде тој: „Европските нации, сите вие собрани овде, би морале да ни се придружите во усвојувањето на истите тие мерки“.
Трамп планира да одржи состанок со украинскиот претседател Володимир Зеленски подоцна во текот на денот.
Тој ги повика европските земји „веднаш да престанат да купуваат руска енергија“ и најави разговори со лидерите на континентот на оваа тема.
Трамп е категоричен дека Иран „никогаш не смее да има нуклеарно оружје“. Општо земено, нуклеарното оружје е, како што истакна, „голема глобална закана“. Затоа ги повика сите земји да го спречат развојот на биолошко оружје и најави дека САД ќе ги предводат меѓународните напори за зајакнување на Конвенцијата за забрана на биолошко оружје, со употреба на системи за вештачка интелигенција за верификација.
Претседателот на САД кажа и дека климатските промени се „најголемата измама“, велејќи дека другите земји ги прекршуваат правилата за загадување.
Трамп, исто така, кажа дека неодамнешните напади на САД врз бродови што превезуваат наводни венецуелски дилери на дрога испратија силна предупредувачка порака до секој што се обидува да внесе дрога во САД.
„Секој терористички бандит што шверцува отровни дроги во САД, предупредени сте – ќе ве уништиме до непостоење“, кажа тој.
Трамп тврди, без да понуди докази, дека секој брод погоден од американските сили содржел дрога која би убила повеќе од 25.000 Американци.
Тој го повтори и своето тврдење дека венецуелскиот претседател Николас Мадуро предводи мрежи за трговија со дрога, што Мадуро го негира.
