Овој потег е последен во серијата напори на администрацијата на Трамп за зајакнување на домашното производство на енергија и спротивставување на политиките за намалување на јаглеродот, предводени главно од демократите. Наредбата доаѓа само неколку часа откако Трамп, републиканец, издаде наредба за зголемување на производството на јаглен.
Наредбата му наложува на американскиот државен обвинител да ги идентификува државните закони што се однесуваат на климатските промени, иницијативите ЕСГ (еколошки, социјални и владеејачки норми), еколошката правда и емисиите на јаглерод диоксид и да преземе акција за нивно блокирање.
„Многу држави донесоа или се во процес на донесување оптоварувачки и идеолошки мотивирани политики за ‘климатските промени’ или енергетски политики што ја загрозуваат енергетската доминација на Америка и нашата економска и национална безбедност“, се вели во наредбата.
Трамп конкретно ги наведе законите во Њујорк и Вермонт со кои се казнуваат компаниите за фосилни горива за нивниот придонес во климатските промени, политиката за ограничување и трговија на Калифорнија и државните тужби со кои се бара да се повикаат енергетските компании одговорни за нивната улога во глобалното затоплување.
Две демократски гувернерки што копретседаваат со американската алијанса за климата, Кети Хочул од Њујорк и Мишел Лујан Гришам од Њу Мексико, рекоа дека на државите не може да им се одземе овластувањето и дека извршната наредба нема да ги спречи.
„Ќе продолжиме да ги унапредуваме решенијата за климатската криза што ги штитат фундаменталните права на Американците на чист воздух и вода, создаваат добро платени работни места, развиваат економија на чиста енергија и ја прават нашата иднина поздрава и побезбедна“, се вели во заедничката изјава.
Алијансата е група од 24 гувернери посветени на климатските активности.
Американскиот институт за нафта, трговска групација за нафта и гас, ја пофалија наредбата.
„Ја поздравуваме акцијата на претседателот Трамп да ги повика на одговорност државите како Њујорк и Калифорнија одговорни за неуставните обиди за незаконско казнување на американските производители на нафта и природен гас за испорачување на енергијата од којашто американските потрошувачи зависат секој ден“, се вели во соопштението на вишиот потпретседател на АПИ, Рајан Меерс.
