Во порака упатена до премиерот на Норвешка, Трамп ја обвини земјата дека не му ја доделила наградата.
„Со оглед на тоа што вашата земја одлучи да не ми ја додели Нобеловата награда за мир за запирање на повеќе од осум војни, повеќе не се чувствувам должен да размислувам исклучиво за мирот, иако тој секогаш ќе биде доминантен, но сега можам да размислувам за тоа што е добро и правилно за Соединетите Држави“, порача Трамп во пораката до која дојдоа американските медиуми.
„Светот не е безбеден освен ако немаме целосна и тотална контрола врз Гренланд“, додаде тој.
Си-би-ес њуз, американскиот партнер на Би-би-си, ја потврди автентичноста на пораката и нејзината содржина.
Премиерот Јонас Гар Стјоре изјави дека ја примил текстуалната порака во неделата, како одговор на пораката што тој и финскиот претседател Александар Стуб му ја испратија на Трамп.
Стјоре кажа дека тие го изразиле своето противење на предложените зголемувања на тарифите во врска со спорот околу Гренланд и укажале на потребата од деескалација, предлагајќи троен телефонски разговор истиот ден.
Стјоре истакна дека Нобеловата награда за мир ја доделува независен комитет, а не норвешката влада. Трамп никогаш не ја криел својата желба да ја добие оваа годишна награда.
Тој сè повеќе инсистира дека САД мора да го преземат Гренланд од причини поврзани со националната безбедност. Слабо населениот, но богат со ресурси арктички остров има важна стратегиска позиција за системи за рано предупредување во случај на ракетни напади, како и за следење на навигацијата во регионот, според Би-би-си.
Трамп повтори дека сака САД да го купат Гренланд и не ја исклучил употребата на воена сила против членката на НАТО за да го преземе.
Во текот на викендот, тој кажа дека ќе воведе царина од 10 проценти на стоки од осум сојузници на НАТО од февруари ако се спротивстават на неговиот план за преземање на Гренланд, заканувајќи се дека ќе ја зголеми на 25 проценти до јуни.
Во порака до Сторе, Трамп вели дека Данска не може да го заштити Гренланд од Русија или Кина и праша „зошто тие воопшто имаат „право на сопственост“? Нема пишани документи, само дека брод се закотвил таму пред стотици години, но ние исто така се закотвивме таму со бродови“.
„Јас направив повеќе за НАТО од кое било друго лице од неговото основање, а сега НАТО треба да направи нешто за Соединетите Американски Држави“, заклучи тој.
Британскиот премиер Кир Стармер денес изјави дека секоја одлука за идниот статус на Гренланд „им припаѓа исклучиво на народот на Гренланд и Кралството Данска“ и дека употребата на тарифи против сојузниците е „погрешна“.
Данскиот министер за одбрана Троелс Лунд Поулсен и министерката за надворешни работи на Гренланд Вивијан Мотцфелд денес треба да се сретнат со генералниот секретар на НАТО Марк Руте.
Минатата недела, данските и гренландските власти, заедно со сојузниците на НАТО, одлучија да го зголемат военото присуство и интензитетот на воените вежби на Арктикот и Северниот Атлантик.
Неколку европски земји испратија мал број воени лица во Гренланд како дел од таканаречената извидувачка мисија.
Според неодамнешната порака на Трамп, тој тврди дека завршил осум војни откако почна неговиот втор мандат како претседател минатата година.
Нобеловата награда за мир ѝ беше доделена на лидерката на венецуелската опозиција Марија Корина Мачадо.
Подоцна, кога американските сили го киднапираа венецуелскиот претседател Николас Мадуро од Каракас, обвинувајќи го за трговија со дрога и други злосторства, Трамп не ја поддржа Мачадо како следна лидерка на земјата, но ја поддржа потпретседателката на Мадуро како привремена шефица на владата.
Мачадо, која зборуваше со пофалби за Трамп, се сретна со него минатата недела во Белата куќа и му го врачи својот медал. Нобеловата фондација објави дека наградата не може „дури ни симболично да се префрли или прераспредели“.
