Трамп даде директен одговор на тоа, објаснувајќи зошто, според него, Мадуро е подготвен да соработува.
„Тој понуди сè. Тој понуди сè, во право сте“, кажа Трамп за Мадуро, а потоа заклучи: „Знаете зошто? Затоа што не сака да се зае*ава со САД“.
NOW – Trump says Venezuela’s Maduro “doesn’t wanna fuck around with the United States.” pic.twitter.com/OauEYSRAOs
— Disclose.tv (@disclosetv) October 17, 2025
Американската војска држи двајца преживеани од осомничен брод за трговија со дрога во Карибите на еден од своите воени бродови, беше објавено претходно денес. Бродот беше погоден во американски напад во кој загинаа уште две лица, потврдија три независни извори, пренесува Ројтерс.
Ова ја зголемува можноста преживеаните од нападот кој се случил вчера да бидат и првите воени заробеници во конфликтот кој претседателот Доналд Трамп го прогласи против „наркотерористичката“ закана, за која тврди дека доаѓа од Венецуела. Пентагон сè уште не одговорил на барањето за коментар.
Еден од изворите изјави дека погодениот брод бил брод под површината на водата, веројатно полуподморница од типот што често го користат шверцерите на дрога за да избегнат откривање.
Пет извори потврдија дека американската војска организирала спасување со хеликоптер за да ги префрли преживеаните на нивниот воен брод. Пред вчерашната операција, во нападите на американската војска врз осомничени бродови за шверц на дрога во близина на Венецуела немало познати преживеани, а снимките објавени од администрацијата на Трамп го покажаа целосното уништување на бродот.
Администрацијата на Трамп претходно соопшти дека 27 лица биле убиени во претходните напади, што предизвика загриженост кај некои правни експерти и демократски пратеници кои се сомневаат во почитувањето на законите за војување. Нападите се случуваат во контекст на значителното воено јакнење на Карибите, кое вклучува разурнувачи со наведувани ракети, борбени авиони Ф-35, подморница на нуклеарен погон и околу 6.500 војници, додека Трамп го ескалира конфликтот со венецуелската влада.
Во средата Трамп откри дека ја овластил Централната разузнавачка агенција (ЦИА) да спроведува тајни операции во Венецуела, поттикнувајќи шпекулации во Каракас дека САД се обидуваат да го соборат претседателот Николас Мадуро.
Во писмо до Советот за безбедност на Обединетите нации, венецуелскиот амбасадор во Обединетите нации Самуел Монкада побара од ОН да ги прогласи нападите на САД покрај брегот на Венецуела за нелегални и да издаде изјава во поддршка на суверенитетот на неговата земја.
Претходно месецов Пентагон во известување до Конгресот откри дека Трамп утврдил дека САД се вклучени во „немеѓународен вооружен конфликт“.
Документот се обиде да ја оправда правната основа на администрацијата на Трамп за употреба на воена сила во Карибите. Пред помалку од една недела Пентагон објави дека неговите операции против наркотици во регионот повеќе нема да бидат предводени од Јужната команда со седиште во Мајами.
Наместо тоа, се формира нова работна група, која ќе биде предводена од Втората морнаричка експедициска сила, единица способна за брзи операции во странство.
Одлуката ги изненади воените аналитичари, бидејќи борбена команда како Јужната команда инаку би ги водела сите операции од висок профил. Вчера, министерот за одбрана Пит Хегсет одеднаш објави дека адмиралот кој ја предводи Јужната команда на САД ќе се повлече на крајот од оваа година, две години пред да му истече мандатот.
