Наредбата ќе ги овласти министерот за одбрана Пит Хегсет, Министерството за одбрана и потчинетите службеници да користат секундарни титули како што се „министер за војна“, „министерство за војна“ и „заменик-министер за војна“ во официјалната кореспонденција и јавните комуникации, според брифинг-документот на Белата куќа. Овој потег, кој веројатно би чинел стотици милиони долари, би го насочил Хегсет да препорача законодавни и извршни мерки потребни за преименувањето да стане трајно.
Откако ја презеде функцијата во јануари, Трамп презеде чекори кон преименување на голем број места и институции, вклучувајќи го и Мексиканскиот Залив, и кон враќање на оригиналните имиња на воените бази што беа променети по протестите за расна правда.
Промените на имињата на министерствата се ретки и за нив е потребно одобрение од Конгресот, но републиканците имаат тесно мнозинство и во Сенатот и во Претставничкиот дом. Лидерите на партиите во Конгресот покажаа мал интерес да се спротивстават на која било од иницијативите на Трамп.
Министерството за одбрана на САД се нарекуваше Министерство за војна до 1949 година, кога Конгресот ги консолидираше Армијата, Морнарицата и Воздухопловните сили по Втората светска војна. Според историчарите, името е избрано делумно за да се сигнализира фактот дека САД во нуклеарната доба биле фокусирани на спречување војни.
Повторната промена на името ќе биде скапа и ќе бара ажурирање на знаците и заглавијата што ги користат не само службениците на Пентагон во Вашингтон, туку и во воените објекти низ целиот свет. Обидот на поранешниот претседател Џо Бајден да преименува девет бази што ја чествуваа Конфедерацијата и нејзините лидери требаше да ја чини војската 39 милиони долари. Тој обид беше поништен од Хегсет претходно оваа година.
Тимот за намалување на владата на администрацијата на Трамп, познат како Оддел за владина ефикасност, се обиде да спроведе намалувања во Пентагон за да заштеди пари.
Критичарите рекоа дека планираната промена на името не е само скапа, туку и непотребна. Но Хегсет рече дека промената на името „не е само прашање на зборови – станува збор за воински етос“.
Оваа година, еден од најблиските конгресни сојузници на Трамп, претседателот на републиканскиот надзорен комитет на Претставничкиот дом, Џејмс Комер, воведе закон што ќе му ги олесни на претседателот реорганизацијата и преименувањето на агенциите.
„Едноставно ќе го направиме тоа. Сигурен сум дека Конгресот ќе се согласи ако треба… Одбраната е премногу одбранбена. Сакаме да бидеме дефанзивни, но сакаме да бидеме и офанзивни ако треба“, рече Трамп минатиот месец.
