Претходно неделава, Трамп изјави дека САД ќе испратат повеќе оружје во Украина, првенствено одбранбено, за да ѝ помогнат на земјата, разорена од војна, да се одбрани од интензивното руско напредување.
Русија во текот на минатата ноќ испрати повеќе од 700 беспилотни летала во Украина, значително повеќе отколку во претходните напади во последните две недели.
Со 728 беспилотни летала и 13 ракети, рускиот напад вклучувал најголем број беспилотни летала ангажирани во една ноќ од војната.
Во петокот, Русија испрати 550 беспилотни летала, помалку од една недела откако лансираше 477, најголем број во тоа време, соопштија функционери.
Русија се обидува да ја пробие украинската противвоздушна одбрана со масовни напади. Се чини дека најновиот напад имал за цел да го наруши клучното снабдување на Украина со западно оружје, пишува Асошиејтед прес.
Градот Луцк, каде што се наоѓаат аеродроми кои ги користи украинската војска, беше најтешко погоден, според украинскиот претседател Володимир Зеленски. Сместен во западна Украина, во близина на границата со Полска, областа е клучен центар за добивање странска воена помош.
Руското министерство за одбрана соопшти дека неговите сили ги таргетирале украинските воздухопловни бази и дека сите назначени цели биле погодени. Во меѓувреме, Украина испрати беспилотни летала во Русија преку ноќ, при што беа убиени три лица, соопштија властите.
