Администрацијата за живеење во заедницата (АЦЛ) ќе биде укината, а нејзините клучни програми ќе бидат префрлени на други агенции во рамките на ХХС, соопштија од одделот. Тие, сепак, не прецизираа кои програми за АЦЛ беа прогласени за неопходни и кои ќе бидат прекинати.
„Ова се програми што буквално спасуваат животи и се исклучително важни“, изјави за Маркетвоч Алисон Баркоф, која ја водеше АЦЛ од 2021 до 2024 година. „Десетици милиони постари лица и лица со попреченост можеби никогаш не слушнале за АЦЛ, но тие знаат за домовите за стари лица, за Оброци на тркала и другите програми што им го подобруваат животот секој ден“, додаде Баркоф.
Според неа, во фискалната 2022 година, АЦЛ обезбедила повеќе од 261 милион оброци за постари лица, им дала помош на повеќе од 1,5 милиони семејни старатели и им помогнала на 250.000 лица со попреченост да продолжат да живеат самостојно.
Според соопштението на ХХС, бројот на нивните вработени со полно работно време ќе се намали од сегашните 82.000 на 62.000. Во исто време, 28 одделенија ќе се спојат во 15, а бројот на подрачните канцеларии ќе падне од 10 на 5. Како дел од оваа реорганизација, АЦЛ повеќе нема да постои.
„Ова нема да заштеди пари. Нема да го направи ХХС поефикасен“, рече Баркоф, додавајќи дека буџетот на АЦЛ изнесува 2,5 милијарди долари, додека вкупниот буџет на ХХС е 1,7 трилиони долари.
Баркоф, која сега предава здравствено право и политика на Универзитетот Џорџ Вашингтон, вели дека укинувањето на АЦЛ, исто така, ќе ја елиминира заштитната мрежа за постарите лица и инвалидите.
„Тоа ќе има огромно влијание“, рече таа, додавајќи дека може да влијае на повеќе од 2.500 организации низ САД што работат со поддршка од АЦЛ.
АЦЛ се укинува во време кога населението на САД старее – во САД живеат 65 милиони луѓе на возраст над 60 години и скоро 57 милиони луѓе со посебни потреби. До 2034 година бројот на старите лица ќе го надмине бројот на децата.
Истовремено, под притисок се и други услуги за стари лица. Управата за социјално осигурување ја намалува својата работна сила за 7.000 (или 12%), ги затвора канцелариите и ги намалува телефонските услуги за некои клиенти. Овие промени ги спроведува Канцеларијата за ефикасност на државната администрација под раководство на Илон Маск.
„Ова е кратковидно и штетно“, Ричард Фиеста, извршен директор на Алијансата за пензионирани Американци, рече дека оваа реорганизација на ХХС и затворањето на АЦЛ се штетни за постарата популација, која сегашниот американски претседател Доналд Трамп тврди дека ја поддржува.
„Доналд Трамп често вели Ние ги сакаме нашите постари лица, но денешните драстични намалувања во ХХС покажуваат колку се празни тие зборови“, се вели во соопштението на Фиеста.
„Намалувањето на бројот на вработени во ХХС нема да им помогне на Американците да живеат подолг и поздрав живот. Уште полошо, елиминирањето на Администрацијата за живеење во заедница – агенцијата која им помага на постарите да останат во своите домови, да пристапат до здравствена заштита и да добијат поддршка за програми како Оброци на тркала и центри за постари лица во заедницата – е кратковидно и штетно за квалитетот на животот.
Овие потези, заедно со промените во Администрацијата за социјално осигурување, „испраќаат јасна и вознемирувачка порака до постарите Американци: „Чувајте се сами“, рече Фиеста.
АЦЛ е основана во 2012 година за да ги обедини под една агенција федералните програми за стари лица и лица со посебни потреби кои претходно биле расфрлани низ различни оддели во рамките на ХХС и други институции.
Услугите што ги даваше вклучуваа програми за луѓе со трауматски повреди на мозокот, центри за луѓе со парализа и губење на екстремитетите и програми што им помагаат на корисниците да се движат низ системот Медикер.
Фред Рикарди, претседател на Центарот за права на Медикер, рече дека елиминирањето на АЦЛ – што тој го опиша како „единствена федерална агенција со задача да ја максимизира независноста, благосостојбата и здравјето на постарите возрасни лица, лицата со посебни потреби, нивните семејства и старателите“ – ќе предизвика „ненадоместлива штета“.
