„Најголемата и најдеструктивна сила на Блискиот Исток е Иран, кој предизвика незамисливо страдање во Сирија, Либан, Газа, Ирак, Јемен и пошироко. Иран има избор помеѓу продолжување на хаосот и теророт и прифаќање на патот кон мирот“, нагласи Трамп, додавајќи дека ова е „последно предупредување и потенцијална можност за дипломатија“, објави Ројтерс.
Тој додаде дека е подготвен да постигне нов договор со Иран, но само ако лидерите на земјата го променат курсот.
„Сакам да склучам договор со Иран. Но, ако иранското раководство ја отфрли оваа маслинова гранка, нема да имаме друг избор освен да примениме огромен, максимален притисок“, рече Трамп на инвестицискиот самит во саудискиот главен град Ријад.
Тој изјави дека ќе го намали извозот на иранска нафта на нула и предупреди дека Иран никогаш нема да има нуклеарно оружје.
„Иран никогаш нема да има нуклеарно оружје. Ова не е понуда што ќе трае вечно“, нагласи тој.
Тој исто така направи силен контраст помеѓу она што го нарече „конструктивна визија“ во Саудиска Арабија и „колапс и страдање“ за кои рече дека се предизвикани од иранските лидери.
„Не може да има посилен контраст во однос на патот што го избравте на Арапскиот Полуостров од катастрофата што се одвива преку пат во Иранскиот Залив“, заклучи Трамп.
Иранскиот министер за надворешни работи Абас Арагчи и претставникот на американскиот претседател Трамп за Блискиот Исток Стив Виткоф во неделата во Мускат одржаа четврта рунда преговори со цел решавање на спорот околу нуклеарната програма на Техеран.
Иранското Министерство за надворешни работи соопшти дека последната рунда индиректни преговори со посредство на Оман била тешка, но корисна за подобро разбирање на позициите на двете страни, додавајќи дека времето и местото на следната рунда преговори ќе ги објави Мускат.
Преговорите имаат за цел ограничување на нуклеарната програма на Иран во замена за укинување на некои од тешките економски санкции што САД ги воведоа врз Иран.
Трамп постојано се закануваше дека ќе изврши воздушни напади врз иранските нуклеарни постројки доколку не се постигне договор, додека иранските претставници постојано предупредуваа дека доколку преговорите не успеат, Иран би можел да се сврти кон развој на нуклеарно оружје со оглед на неговите залихи на високо збогатен ураниум.
