Во објава напишана со големи букви на платформата Трут сошл, Трамп рече дека одлуката ја донел врз основа на „тонот и карактерот“ на разговорите.
„ЗАДОВОЛСТВО МИ Е ДА ИЗВЕСТАМ ДЕКА СОЕДИНЕТИТЕ АМЕРИКАНСКИ ДРЖАВИ И ДРЖАВАТА ИРАН, ВО ИЗМИНАТИТЕ ДВА ДЕНА, ВОДЕА МНОГУ ДОБРИ И ПРОДУКТИВНИ РАЗГОВОРИ ВО ВРСКА СО ЦЕЛОСНО И КОНЕЧНО РЕШАВАЊЕ НА НАШИТЕ НЕПРИЈАТЕЛСТВА НА БЛИСКИОТ ИСТОК“, напиша Трамп.
„ВРЗ ОСНОВА НА ТОНОТ И КАРАКТЕРОТ НА ОВИЕ ДЕТАЛНИ, СЕОПФАТНИ И КОНСТРУКТИВНИ РАЗГОВОРИ, КОИ (sic) ЌЕ ПРОДОЛЖАТ ВО ТЕКОТ НА НЕДЕЛАТА, МУ НАЛОЖИВ НА МИНИСТЕРСТВОТО ЗА ВОЈНА ДА ГИ ОДЛОЖИ СИТЕ ВОЕНИ НАПАДИ ВРЗ ИРАНСКИТЕ ЕЛЕКТРОЦЕНТРАЛИ И ЕНЕРГЕТСКА ИНФРАСТРУКТУРА ЗА ПЕРИОД ОД ПЕТ ДЕНА, ЗАВИСНО ОД УСПЕХОТ НА ТЕКОВНИТЕ СОСТАНОЦИ И РАЗГОВОРИ“, додаде тој.
Трамп претходно се закани дека ќе изврши напади врз иранските електроенергетски објекти до понеделник навечер доколку Иран не дозволи целосно повторно отворање на Ормускиот теснец — клучен поморски премин за глобалната економија.
Минатата недела, пак, Трамп изјави дека не е заинтересиран за прекин на огнот со Иран. „Можеме да разговараме, но не сакам прекин на огнот“, рече тој.
Иран: Не сме разговарале со него
Од друга страна, Иран негира дека воопшто постои дијалог со Вашингтон. Според иранското министерство за надворешни работи, тврдењата на Трамп се обид да се намалат цените на енергенсите и да се купи време за воени планови.
Повеќе ирански државни медиуми, повикувајќи се на министерството, наведуваат дека постојат „иницијативи“ од регионални земји за „намалување на тензиите“, но Техеран порачува дека „не е страната што ја почнала оваа војна“ и дека сите вакви барања треба да се упатат кон Вашингтон.
