„Илон е фантастичен“, им рече Трамп на новинарите во Ер Форс 1 додека леташе за американската сојузна држава Флорида.
Маск, шефот на Тесла и Спејсекс, стана мета на критики бидејќи начинот на кој раководи со Одделот за владина ефикасност (ДОГЕ) доведе до отпуштања на илјадници државни службеници. Речиси 200.000 вработени се отпуштени, ќе бидат отпуштени или прифатиле отпремнина.
Поради ова, продавниците за автомобили на Тесла беа вандализирани во САД и ширум светот, а национален протест против ДОГЕ и агендата на Трамп е планиран за во сабота.
Политико и Еј-би-си неодамна објавија дека Трамп им рекол на членовите на својот кабинет дека Маск наскоро ќе замине и ќе се врати во приватниот сектор, иако не е јасно дали тоа значи дека Маск ќе замине пред да му заврши мандатот на крајот на мај.
Трамп синоќа изјави дека Маск може „да остане колку што сака“. „Тој ќе остане одреден временски период, а потоа целосно ќе се врати на своите бизниси. Но, тој работи фантастична работа“, рече Трамп.
Запрашан колку долго ќе остане, Трамп рече: „Мислам неколку месеци“.
Белата куќа во средата објави дека Маск ќе остане на функцијата додека не ја заврши задачата на ДОГЕ за намалување на владините трошоци и намалување на федералните вработени, отфрлајќи ги медиумските извештаи дека наскоро ќе ја напушти функцијата и ќе се врати во приватниот сектор.
