Во барањата кои Трамп организацијата ги поднела до Федералната канцеларија за патенти и трговски марки се бараат ексклузивни права за користење на името на претседателот не само за аеродромите, туку и за десетици поврзани производи и услуги. Ова вклучува сè од патнички автобуси, чадори и патни торби до пилотски одела. Поднесени се апликации за три називи: „Меѓународен аеродром претседател Доналд Џ. Трамп“, „Меѓународен аеродром Доналд Џ. Трамп“ и „ДЏТ“.
Овој потег доаѓа во време кога на Флорида се дебатира за државен закон со кој аеродромот во Палм Бич би се преименувал во чест на Трамп. Тој е поврзан и со спорот околу финансирањето на тунелот помеѓу Њујорк и Њу Џерси, со предлози и тој тунел и на Меѓународниот аеродром Далес во Вирџинија да го носат неговото име.
Трамп организацијата соопшти дека барањата ги поттикнале предлозите од Флорида и дека нивната цел не е профит, туку само заштита од „злонамерни актери“. Тие наведуваат дека името Трамп е „трговската марка која најмногу неовластено се користи во светот“.
„Да бидеме апсолутно јасни, претседателот и неговото семејство нема да добиваат никакви авторски права, надомести за лиценцирање или каква било друга финансиска компензација од предложеното преименување на аеродромот“, се наведува во соопштението на компанијата, мислејќи на сегашниот меѓународен аеродром Палм Бич во близина на клубот на Трамп Мар-а-Лаго.
Компанијата не одговорила веднаш на прашањето дали во иднина ќе наплаќа надомест за користење на името на други аеродроми или за продажба на стоките наведени во барањата за заштита.
Џош Гербен, адвокат за интелектуална сопственост кој ги открил барањата, кажа дека барањата се први од ваков вид што некогаш ги видел.
„Иако се случува знаменитости да се именувани по претседатели и јавни службеници, приватна компанија на актуелен претседател никогаш во историјата на Соединетите Американски Држави не побарала права за трговска марка за такво именување однапред“, напиша Гербен на својот блог. „Морам да бидам многу јасен, ваквите апликации за трговски марки се сосема без преседан.“
Барањата се поднесени од оддел на семејниот бизнис наречен ДТТМ оперејшнс. Семејството во изминатата година интензивно го проширувала својот бренд, ставајќи го своето име на кули, голф-центри и станбени комплекси во Дубаи, Индија, Саудиска Арабија и Виетнам. Компанијата продавала електрични гитари, Библии и патики со брендот на Трамп, потфати кои исто така спаѓаат во рамките на одделот ДТТМ.
Како одговор на критиките дека тој и неговото семејство профитираат од неговото претседателствување, Трамп кажа дека неговиот бизнис го водат неговите синови преку фондација и дека тој не е вклучен во секојдневното управување со компанијата.
