Зборувајќи во поморската база Норфолк, веднаш до носачот на авиони УСС Хари С Труман, Трамп ги пофали напорите на морнарицата во борбата против она што го нарече „картелски терористи“, истакнувајќи дека уште еден брод бил погоден во саботата.
„Во последните неколку недели, морнарицата ја поддржуваше нашата мисија да ги уништиме картелските терористи… елиминиравме уште еден синоќа. Сега едноставно не можеме да ги најдеме“, кажа Трамп. Иако го спомна нападот во саботата, не е сосема јасно дали се мисли на инцидентот што се случи во петокот или на друг напад.
„Тие повеќе не доаѓаат по море, па сега ќе мора да почнеме да гледаме кон копното бидејќи ќе бидат принудени да одат по копно“, додаде тој, што се толкува како закана за напад врз Венецуела.
US forces hit another vessel allegedly carrying illegal drugs off the coast of Venezuela on October 4, President Donald Trump said, adding that the country would also start looking at drug trafficking occurring on land https://t.co/pda33i9JA9 pic.twitter.com/D5yOSEV1b4
— Reuters (@Reuters) October 6, 2025
Во меѓувреме, Русија ги осуди нападите на Соединетите Американски Држави врз бродовите крај брегот на Венецуела и предупреди за можна ескалација на конфликтот во карипскиот регион. Во телефонски разговор со својот венецуелски колега Иван Гил во неделата, рускиот министер за надворешни работи Сергеј Лавров го осуди нападот, кој се случил во меѓународни води.
„Министрите изразија сериозна загриженост поради ескалацијата на дејствата на Вашингтон во Карипско Море, кои носат далекусежни последици за регионот“, се вели во соопштението на руското министерство за надворешни работи. „Руската страна ја потврди својата целосна поддршка и солидарност со раководството и народот на Венецуела во сегашниот контекст“.
Министерот за одбрана на САД Пит Хегсет, во неделата за Фокс њуз изјави дека има „сите потребни овластувања“ за извршување воени напади врз бродови покрај брегот на Венецуела, без да даде детали за тоа какви се овластувањата. По нападот во петокот, Хегсет објави на социјалната мрежа Икс дека бродот превезувал „значајни количини наркотици – наменети за Америка за да го отрујат нашиот народ“.
„Овие напади ќе продолжат сè додека нападите врз американскиот народ не престанат!!!!“, порача тој. На снимката од нападот се гледа како ракети го погодуваат бродот, предизвикувајќи експлозија. Тој тврди дека разузнавачките информации „без сомнение“ потврдиле дека станува збор за „наркотерористи“, но без да даде докази за видот или количеството на дрога.
Earlier this morning, on President Trump’s orders, I directed a lethal, kinetic strike on a narco-trafficking vessel affiliated with Designated Terrorist Organizations in the USSOUTHCOM area of responsibility. Four male narco-terrorists aboard the vessel were killed in the… pic.twitter.com/QpNPljFcGn
— Secretary of War Pete Hegseth (@SecWar) October 3, 2025
Најновите напади го зголемуваат вкупниот број на вакви американски операции на најмалку четири, а можеби и пет, со најмалку 21 убиено лице. Во четвртокот Трамп го информираше Конгресот дека неговата администрација ги прогласила членовите на нарко-картелите за „нелегални борци“ со кои САД се вклучени во „немеѓународен вооружен конфликт“.
Венецуелскиот претседател Николас Мадуро постојано тврди дека САД сакаат да го соборат од власт, додека министерот за одбрана Владимир Падрино ги нарече нападите на САД „вулгарност, провокација и закана за националната безбедност“. Од друга страна, Вашингтон се повикува на уставот на САД, правото на самоодбрана и меѓународното право како правна основа за нападите.
Сепак, бројни правни експерти и законодавци предупредуваат дека употребата на воена сила против наводни криминалци во меѓународни води го заобиколува правниот процес и нема јасна правна основа.
BREAKING NEWS: President Trump publishes video images of the US army carrying out an attack on a ship carrying drugs from Venezuela.
I don’t know the real information of all this and possibly all this is false but I can’t deny that I’m starting to believe that Maduro is a drug… pic.twitter.com/Jae0VwbPTH
— GG (@LuillyDRR) September 2, 2025
На крајот на септември беше објавено дека американските воени функционери подготвуваат опции за напади врз цели поврзани со шверцери на дрога во Венецуела, а овие напади би можеле да започнат за неколку недели.
Според четири извори на Ен-би-си њуз, нападите во Венецуела би можеле да се случат во следните неколку недели, но претседателот сè уште не ги одобрил. Два извори и уште еден функционер запознаен со разговорите кажале дека администрацијата верува дека ескалацијата е делумно резултат на тоа што венецуелскиот претседател Николас Мадуро не презема доволно мерки за да го спречи протокот на нелегални дроги од неговата земја.
Плановите што се разгледуваат главно вклучуваат напади со беспилотни летала врз членови и раководство на групи за трговија со дрога и уништување на лаборатории за производство на дрога, изјавиле изворите на Ен-би-си њуз. На барањето за коментар Белата куќа се повика на претходната изјава на претседателот: „Ќе видиме што ќе се случи. Венецуела ни ги испраќа своите членови на банди, своите дилери и својата дрога. Тоа е неприфатливо“. Пентагон одби да коментира.
