На 4 август, во 15:10 часот, бизнисменот Халит Јукај испловил со својот брод „Грејволф“ од Јалова кон Бозџаада. Неговите роднини ги известиле тимовите на крајбрежната стража подоцна во текот на денот откако не можеле да го контактираат. Кога тимовите ја започнале потрагата, околу 14:30 часот на 5 август, од комерцијален брод што пловел во близина на Туранкеј на полуостровот Капидаг во Баликешир, била примена пријава дека на површината на морето пронашле делови од полупотопен брод.
Безживотното тело на Јукај беше пронајдено завчера, на 19-тиот ден од почетокот на пребарувањето што го спроведуваат заеднички тимови од Крајбрежната стража и Пристанишната полиција.
Телото на бизнисменот беше пронајдено со помош на сонар на длабочина од 68 метри во областа каде што се случила несреќата и беше фотографирано од РОВ (беспилотно подводно возило). Околу телото беа пронајдени и плочите на моторот на чамец и делови од чамец.
РОВ, кој може да фотографира и скенира до 300 метри длабочина, може да крева и подводни предмети на површината со помош на рачка на својот механизам, но, за да се зачува телото, се планира операцијата да се спроведе во соработка со Командата на поморските сили. Планирано е телото да се извлече од морето со помош на систем „лифт“.
Според Хуриет, турскиот актер Киванч Татлитуг, близок пријател на Халит Јукај и последното лице со кое разговарал на денот кога исчезнал, го следи пребарувањето чекор по чекор веќе 19 дена.
Татлитуг вчера објави на социјалните мрежи дека екипи на Крајбрежната стража и Морнаричките сили моментално работат вредно за да го извлечат неговото тело од морските длабочини.
Јукај е турски бизнисмен, инженер и главен дизајнер на јахти во бродоградилиштето што го поседувал во населбата Алтинова во Јалова.
Покрената е истрага за да се утврди причината за несреќата на бродот, кој бил оштетен и потонал. Капетанот на товарниот брод за кој се сомнева дека се судрил со јахтата на Јукај е уапсен, а во тек е обдукција.
Првичните резултати од истрагата потврдија дека остатоците од боја на гребнатините на остатоците од јахтата на Јукај и оние на предниот дел од товарниот брод „Арел 7“ се совпаѓаат.
