Силните поплави предизвикани од поројните дождови во петокот одзедоа 43 животи во округот Кер, најтешко погодениот округ, и вкупно седум смртни случаи во три други окрузи, соопштија локалните власти за Франс прес.
Меѓу исчезнатите се и 27 млади девојки од летниот камп Камп Мистик. Менаџерот на градот Кервил, Далтон Рајс, изјави дека може да има уште исчезнати луѓе во регионот.
Властите претходно соопштија дека надојдените води се повлекуваат околу реката Гвадалупе, на околу 137 километри северозападно од Сан Антонио, каде што беа спасени најмалку 237 лица, од кои повеќе од 100 со хеликоптери.
Претседателот Доналд Трамп рече дека „ќе се погрижи за нив“ на прашањето за федералната помош при катастрофи.
Заменик-гувернерот на Тексас, Ден Патрик, изјави дека 500 спасувачи трагаат по непознат број на лица кои сè уште се водат како исчезнати, вклучувајќи многумина кои го прославуваа Денот на независноста во областа во близина на реката.
Далтон Рајс, градски менаџер на Кервил, седиштето на округот, во петокот изјави за новинарите дека екстремните поплави ја погодиле областа пред зори без речиси никакво предупредување, оставајќи ги властите неспособни да издадат наредби за евакуација навреме бидејќи реката Гвадалупе се издигна над она што се смета за голема поплава за помалку од два часа.
