Предлогот на Кина, Пакистан, Саудиска Арабија и други беше усвоен на годишното собрание на организацијата во Женева со 95 гласа „за“, четири „против“ (Израел, Унгарија, Чешка и Германија) и 27 „воздржани“.
Одлуката доаѓа откако Генералното собрание на Обединетите нации минатата година го одобри палестинското членство во организацијата и во време кога постојат знаци дека Франција може да ја признае палестинската држава.
Либанската делегатка Рана ел-Хури рече дека исходот од гласањето нуди мал зрак надеж за храбриот палестински народ чие страдање достигна неподносливо ниво, во разорната војна меѓу Израел и Хамас во Појасот Газа. Израел се спротивстави на резолуцијата на СЗО и побара гласање. Неговиот главен сојузник, САД, кои имаат намера да ја напуштат СЗО, не учествуваа во гласањето.
Иако речиси 150 земји ја признаа палестинската држава, повеќето западни и некои други сили не го сторија тоа, вклучувајќи ги САД, Велика Британија, Франција, Германија и Јапонија. Франција и Јапонија го поддржаа предлогот, додека Велика Британија беше воздржана.
„Тоа е симболичен и единствен чин, но исто така и знак дека сме дел од меѓународната заедница со цел да помогнеме во здравствените потреби“, изјави за Ројтерс Ибрахим Храиши, палестинскиот амбасадор во ОН во Женева. „Се надевам дека наскоро ќе имаме полноправно членство во СЗО и сите форуми на ОН“, додаде тој.
Палестинците бараат државност на териториите освоени од Израел во Блискоисточната војна во 1967 година. Тие официјално имаат статус на набљудувач во СЗО, организација што е во процес на трансформација и дискутира за својата иднина без својот најголем донатор, САД.
Минатата недела, Палестинците го искористија своето право да добиваат известувања според Меѓународните здравствени регулативи на СЗО, збир на глобални правила за следење на епидемии на болести.
