Засилените геополитички тензии резултирале со зголемување на воените трошоци во сите светски региони, со особено брз раст во Европа и на Блискиот Исток, покажуваат податоците на Меѓународниот институт за истражување на мирот во Стокхолм (СИПРИ).
„Повеќе од 100 земји низ светот го зголемиле своето воено трошење во 2024 година“, соопшти СИПРИ. „Бидејќи владите сè повеќе ѝ даваат приоритет на воената безбедност, често на штета на други буџетски области, економските и општествените компромиси би можеле значително да влијаат на општествата во годините кои доаѓаат“, кажа тој.
Војната во Украина и сомнежите во американската посветеност на НАТО резултирале со пораст на военото трошење во Европа (вклучувајќи ја Русија) за 17 отсто, со што европското воено трошење го надминало нивото забележано на крајот на Студената војна. Руските воени трошоци ги достигнале проценетите 149 милијарди долари во 2024, што е зголемување од 38 отсто во однос на 2023 и двојно повеќе во однос на 2015. Тоа претставува 7,1 отсто од рускиот БДП и 19 отсто од сите трошоци.
Вкупните воени трошоци на Украина пораснале за 2,9 отсто и достигнале 64,7 милијарди долари, што е 43 отсто од руските трошоци. Со 34 отсто од БДП, Украина го имала најголемото воено оптоварување од сите земји во 2024 година. „Украина во моментов сите свои даночни приходи ѝ ги дава на својата војска“, вели СИПРИ.
„Во така ограничен фискален простор, на Украина ќе ѝ биде тешко да продолжи да го зголемува военото трошење“, се истакнува. Военото трошење на Соединетите Американски Држави пораснало за 5,7 отсто и достигнало 997 милијарди долари, што е 66 отсто од вкупното трошење на НАТО и 37 отсто од вкупното воено трошење во 2024 година.
