„Светот никогаш не доживеал нарушување на снабдувањето со енергија од вакви размери“, рече тој во интервју за францускиот весник објавено денес.
Тој додаде дека ќе бидат погодени европските земји, како и Јапонија, Австралија и други, но дека најзагрозени се земјите во развој, кои ќе страдаат поради повисоките цени на нафтата и гасот, повисоките цени на храната и општото забрзување на инфлацијата.
Земјите членки на Меѓународната агенција за енергија минатиот месец се договорија да ослободат дел од своите стратегиски резерви. Дел од тоа веќе е пуштено на пазарот и процесот продолжува, рече Бирол.
Како реакција на нападите на Израел и Соединетите Американски Држави, Иран речиси целосно го блокира сообраќајот во Ормускиот теснец, низ кој вообичаено минуваат околу 20 проценти од светската нафта и гас, што предизвика нагло зголемување на цените на енергијата.
Важноста на нафтата се гледа токму во структурата на производите што настануваат при преработка на еден барел сурова нафта: дел оди за горива како бензин и дизел, а остатокот го сочинуваат авионско гориво, течен гас, петрохемиски суровини и производи како мазива, восоци и асфалт.
Тоа значи дека нафтата не е клучна само за транспортот, туку и за цела низа индустрии — од производството на пластика и хемикалии до градежништвото и логистиката. Кога ќе дојде до нарушување во снабдувањето, последиците не се чувствуваат само на бензинските пумпи, туку се прелеваат врз цените на храната, транспортот, индустриските производи и инфраструктурата, што дополнително ја поттикнува инфлацијата и ги забавува економиите.
