Како што се наведува во соопштението на судот, копија од пресудата, изречена на 26 февруари, e испратена на адресата на Додик во понеделникот. Доколку Додик не поднесе жалба во законскиот рок, пресудата автоматски ќе стане правосилна, а потоа ќе има избор да оди во затвор или да побара од судот да му одобри откуп на казната за околу 18 илјади евра.
Во БиХ, законски е можно да се откупи казна до една година затвор по цена од 100 конвертибилни марки (50 евра) по ден, но судот може, а не мора да го дозволи тоа.
Додик беше осуден откако беше прогласен за виновен за кривичното дело за неисполнување на одлуките на високиот претставник на меѓународната заедница, а покрај затворската казна, му беше изречена и забрана за вршење на функцијата претседател на Република Српска или на која било друга изборна функција во период од шест години.
Веднаш по изрекувањето на пресудата изјави дека не планира да се жали, но дека конечната одлука по ова прашање ќе ја препушти на своите бранители. Потоа, адвокатот Горан Бубиќ и Анто Нобило, кој беше член на одбраната и правен советник, дадоа контрадикторни изјави од кои можеше да се заклучи дека и тие не се сигурни што ќе преземат.
Додека Бубиќ објаснуваше дека ја чекаат одлуката на Додик, Нобило рече дека секако ќе се жалат, но после тоа најави дека се повлекува од тимот на одбраната бидејќи сè се претвора во политички процес.
„Јас сум адвокат во оваа судска постапка, а сега кога Република Српска не ги признава одлуките на Судот и Обвинителството на БиХ, нема простор за судска постапка бидејќи тие не ги признаваат тие одлуки“, го објасни Нобило своето повлекување.
Тој го стори тоа откако Додик поттикна усвојување закони во Националното собрание на РС со кои ќе се обидат да го спречат делувањето на државниот суд и обвинителството во тој ентитет. Забраната се однесува и на Државната агенција за истраги и заштита (СИПА), која е прогласена за неуставна во РС.
Уставниот суд на БиХ ги суспендираше овие закони и сега се очекува конечна пресуда за нивната усогласеност со уставот на БиХ.
Додик, како и премиерот на Република Српска (РС) Радован Вишковиќ и претседателот на парламентот на ентитетот Ненад Стевандиќ, сега се соочени со нова истрага поради сомневање дека сториле кривично дело за поткопување на уставниот поредок, за кое се предвидува минимална казна затвор од пет години.
Сите тројца одбија да одговорат на поканите за распит, па по барање на Обвинителството на БиХ, државниот суд им одреди мерка притвор во траење од еден месец, а по нив е распишана полициска потерница која во моментов важи на целата територија на БиХ.
И покрај оваа потерница, Додик во понеделникот отпатува за Белград, а засега нема објаснување како успеал да го стори тоа, бидејќи граничната полиција ќе морала да го уапси и да ѝ го предаде на правосудната полиција.
