Израел во средата почна напади врз Дамаск, насочувајќи се и кон владините сили на југот од земјата за да се обиде да ги принуди да се повлечат, велејќи дека сака да ги заштити сириските Друзи, дел од мало, но влијателно малцинство, кое живее во Либан и Израел.
„Во однос на интервенцијата и активностите на Израел… САД не ги поддржаа неодамнешните израелски напади“, изјави портпаролката на Стејт департментот, Тами Брус, за новинарите.
„Одржуваме дипломатски контакти со Израел и Сирија на највисоко ниво за да ја решиме сегашната криза и да постигнеме траен договор меѓу двете суверени држави.“
Брус одби да каже дали САД го поддржуваат Израел во спроведувањето вакви воени операции кога смета дека се неопходни.
„Нема да зборувам за идни или минати дискусии. Сега имаме оваа конкретна епизода… и мислам дека бевме многу јасни во врска со нашето незадоволство, претседателот сигурно го стори тоа, и ние реагиравме многу брзо за да ги запреме нападите“, рече таа.
Таа додаде дека САД го осудуваат насилството во Сирија и дека активно соработуваат со сите страни во таа земја со цел да се тргне по патот на мирот и да се продолжат разговорите за интеграција, и ја повика сириската влада да ги предводи тие напори.
