Државниот секретар Марко Рубио ги известил американските конзулати и амбасади низ целиот свет за промените во телеграма од 6 ноември, според копија која ја добил Вашингтон пост. Овој потег им дава на службениците за визи ново оправдување за одбивање на апликантите, во најновиот обид на администрацијата на Трамп да го ограничи протокот на имиграцијата.
„Мора да го земете предвид здравјето на апликантот. Одредени медицински состојби, вклучувајќи, но не ограничувајќи се на кардиоваскуларни заболувања, респираторни заболувања, рак, дијабетес, метаболички заболувања, невролошки заболувања и состојби на ментално здравје, може да бараат нега во вредност од стотици илјади долари“, се наведува во телеграмата.
Телеграмата потоа им предлага на конзулатите да ја земат предвид дебелината при одлучувањето дали да одобрат визи, забележувајќи дека тоа може да предизвика апнеа при спиење, висок крвен притисок и клиничка депресија.
„Овие упатства им даваат на конзуларните службеници широка дискреција да одбијат и емигрантски и неемигрантски визи врз основа на вообичаени медицински состојби кои никогаш не биле третирани како дисквалификувачки сами по себе“, предупреди Вик Гоел, адвокат за емиграција во Рестон, Вирџинија.
Заменик-портпаролката на Белата куќа Ана Кели изјави дека „100-годишната политика на Стејт департментот вклучува овластување за одбивање визи на апликанти кои би претставувале финансиски товар за даночните обврзници, како што се лица кои барале јавно финансирана здравствена заштита во Соединетите Американски Држави и би можеле дополнително да ги исцрпат ресурсите за здравствена заштита на американските граѓани“.
„Администрацијата на претседателот Трамп конечно целосно ја спроведува оваа политика и ги става Американците на прво место“, додаде таа.
Упатството на Стејт департментот им наложува на службениците за визи да ги сметаат апликантите за неподобни за влез во САД и од неколку нови причини, вклучително и дали се веќе пензионирани, колку издржувани лица, деца или постари родители имаат и дали издржуваните лица имаат „посебни потреби“ или попреченост.
Критичарите на новата директива истакнуваат дека администрацијата на Трамп се потпира на идејата дека здравствената состојба создава финансиски товар за САД.
„Иако здравјето отсекогаш било еден од неколкуте законски фактори кои конзуларните службеници можат да ги земат предвид при утврдувањето на јавниот товар, претходната пракса била тесна и поврзана со специфични наоди, на пример, состојби што веројатно ќе резултираат со институционализација на трошок на владата“, забележува адвокатот Гоел.
„Тука телеграмата им наложува на службениците да разгледаат широк список на хронични и чести медицински состојби, конкретно поврзувајќи ги со потенцијалните трошоци за нега во текот на животниот век на подносителот на барањето“, нагласува тој.
Директивата на Стејт департментот важи и за носителите на привремени визи, како што се носителите на визи Х-1Б, како и за емигрантите кои бараат постојан престој во САД од работни и семејни причини. Новата директива е најновиот пример за построгиот став на администрацијата на Трамп кон легалната имиграција, вклучувајќи ги забраните за патување и откажувањето на одредени хуманитарни програми за имиграција.
Стивен Хелер, британски адвокат за емиграција кој работел како службеник за емиграција во САД, кажа дека американските конзуларни службеници обично имаат значителна дискреција да одбијат визи врз основа на сопственото толкување на правилата. Тој истакна дека директивата им дава на службениците за визи „повеќе причини да не издадат виза“.
Директивата на Стејт департментот се чини дека оди подалеку од техничките упатства на Центрите за контрола и превенција на болести (ЦДЦ) за медицински критериуми за емигранти во САД, кои вклучуваат тестови за туберкулоза и сифилис и скрининг за злоупотреба или зависност од дрога, како и евиденција за вакцинација.
Во упатствата, исто така, се бара од службениците за визи да направат сопствена проценка за тоа колку медицинската состојба на лицето може да ги чини САД.
„Дали подносителот на барањето има соодветни финансиски средства за да ги покрие трошоците за таква грижа во текот на целиот свој животен век без да бара јавна финансиска помош или долгорочна институционализација на трошок на владата“, се наведува во телеграмата.
