Тврдењата на Доналд Трамп дека британската војска не била на првата линија на бојното поле во Авганистан предизвикаа бес во Обединетото Кралство, а премиерот Кир Стармер ги нарече „навредливи и ужасни“.
Ветераните, нивните семејства и политичари од сите партии остро ги осудија изјавите на американскиот претседател, а мајката на еден од најтешко повредените војници ги опиша како „крајна навреда“, пишува Скај њуз.
Во интервју за Фокс њуз во Давос, Трамп ја повтори својата критика кон сојузниците во НАТО, доведувајќи ја во прашање нивната сигурност. „Никогаш не ни требаа. Ќе кажат дека испратиле некаква војска во Авганистан… и навистина испратија, останаа малку позади, малку подалеку од бојното поле“, рече тој.
The US has the most disgusting, deceitful, narcissistic, and corrupt president of all time:
“We never needed NATO,” Trump declared.
“We never asked anything of them. You know, they say they sent troops to Afghanistan, and they did. But they stayed back a little, a little… pic.twitter.com/lpXqQiwIBq
— Jürgen Nauditt 🇩🇪🇺🇦 (@jurgen_nauditt) January 22, 2026
„Ги сметам изјавите на претседателот Трамп за навредливи и, искрено, ужасни.“ Тој додаде дека не изненадува што тие им „нанеле толкава болка на најблиските на оние што загинале или биле повредени“ и дека тој, на местото на Трамп, „сигурно би се извинил“, изјави британскиот премиер денес попладне.
Даунинг стрит соопшти дека Трамп „погрешил“ со минимизирањето на улогата на британските трупи, истакнувајќи дека тие служеле заедно со американските сили во „долготрајни борбени операции“. Портпаролот на премиерот потсети на 457 загинати британски војници и „многу стотици“ ранети, додавајќи: „Ние сме неверојатно горди со нашите вооружени сили, а нивната служба и жртва никогаш нема да бидат заборавени.“
Политичари од различни партии им се придружија на осудите. Министерот за одбрана во сенка Џон Хили нагласи: „Членот 5 на НАТО беше активиран само еднаш. Обединетото Кралство и сојузниците од НАТО одговорија на повикот на САД. И повеќе од 450 британски припадници ги загубија животите во Авганистан.“ Лидерот на либералните демократи сер Ед Дејви истакна: „Трамп петпати избегнал воена служба. Како се осмелува да ја доведува во прашање нивната жртва.“
Дајан Дерни, мајка на Бен Паркинсон, кој се смета за најтешко повредениот британски војник што го преживеал војувањето, изјави дека изјавите на Трамп се „крајна навреда“. Нејзиниот син во 2006 година, при експлозија на мина, ги загубил двете нозе и претрпел тешки оштетувања на мозокот и ’рбетот. „Можам да ве уверам, талибанците не поставуваа импровизирани експлозивни направи километри и километри подалеку од бојното поле“, изјави таа. „Да го слушнете овој човек како вели: ‘Па, добро, само сте се мотале зад бојното поле’… Тоа е крајна навреда.“
Роберт Дикетс, чиј син Оливер загинал во Авганистан во 2006 година, коментира: „Кога го прочитав тоа, си помислив: ‘Каква дрскост!’“. Тој додаде дека „познавањето на историјата од страна на Доналд Трамп е сериозно недоволно“.
Пратеникот и ветеран Ал Карнс, кој петпати служел во Авганистан, рече: „Служев многупати заедно со моите американски колеги. Заедно пролеавме крв, пот и солзи. Не се вратија сите дома.“ Друг ветеран, пратеникот Бен Обис-Џекти, изјави: „Од прва рака ги видов жртвите што ги поднесоа британските војници со кои служев во Сангин, каде што претрпевме страшни загуби, како и американските маринци следната година.“
Авганистан е единствениот конфликт во кој е применет членот 5 на НАТО за колективна одбрана, активиран од САД по нападите на 11 септември. За време на војната загинаа 2.461 американски војник, додека сојузниците, меѓу кои и Обединетото Кралство, претрпеа 1.160 смртни случаи, што претставува околу една третина од вкупните коалициски жртви. Британските сили водеа тешки битки во градови како Сангин, Муса Кала и Над Али.
Наспроти искуствата на војниците на терен, Доналд Трамп петпати ја избегнал регрутацијата за Виетнамската војна, четири пати поради студентски статус и петтиот пат поради лекарска потврда за „коскени израстоци“.
Поранешниот британски амбасадор во Авганистан, сер Николас Кеј, изјави за Скај њуз дека американскиот претседател „греши“ и дека „очигледно не го цени и не го почитува НАТО на начинот на кој би требало“.
