Вицепремиерот и министер за внатрешни работи на Србија Ивица Дачиќ изјави дека Милорад Додик и Ненад Стевандиќ се државјани на Република Срибја, додавајќи дека меѓународните потерници на кои БиХ се повикува сè уште не ја минале контролата на Генералниот секретаријат на Интерпол во врска со исполнетоста на условите за нивно објавување и дека самите не претставуваат основа за постапување.
„Република Србија цврсто и решително ги штити правата и интересите на своите државјани, и на домашно и на меѓународно ниво. Нашата држава е посветена на зачувувањето на суверенитетот и човековите права на своите граѓани, препознавајќи дека заштитата на секој поединец е темел на нашите меѓународни обврски. И Милорад Додик и Ненад Стевандиќ се државјани на Република Србија, а меѓународните потерници на кои се повикува БиХ сè уште не ја минале контролата на Генералниот секретаријат на Интерпол во врска со исполнетоста на условите за нивно објавување и самите не претставуваат основа за постапување“, наведе Дачиќ.
Тој наведе дека, имајќи предвид дека станува збор за државјани на Србија, Интерпол Белград испратил до Генералниот секретаријат на Интерпол протестна нота бидејќи во барањата за распишување меѓународни потерници е прекршен членот 3 на Статутот на Интерпол.
„Во Организацијата е строго забранета каква било активност или интервенција во прашања или случаи кои имаат политичка, воена, верска или расна позадина. Генералниот секретаријат на Интерпол го потврди приемот на нашиот протест и наведе дека ќе го разгледа, како и дека ќе нè информира навремено за резултатите на разгледувањето.
Истакнувам дека Србија во секој момент се залага за почитување на меѓународните норми, но во исто време нема да дозволи каков било обид за загрозување на правата на нашите државјани од страна на други држави или меѓународни тела. Србија е одлучна да продолжи да се бори за своите права и правата на своите граѓани на глобалната сцена, со почитување на меѓународните правни рамки, во согласност со сопствените вредности и принципи“, порача Дачиќ.
Меѓутоа, Србија е обврзана да го екстрадира Додик ако се распише потерница на Интерпол, а врз основа на Договорот за екстрадиција склучен меѓу Србија и Босна и Херцеговина во 2013 година. Тој договор во членот 8 пропишува дека екстрадиција, во овој контекст, на Милорад Додик не спречува фактот дека тој има двојно државјанство, односно дека има и државјанство на Србија.
Тој во Сараево е обвинет за кривично дело напад на уставниот поредок, со најмала пропишана казна затвор од пет години, а токму во договорот меѓу Србија и БиХ е пропишано дека државата договорничка ќе екстрадира и свои државјани, ако во другата држава договорничка се осомничени за кривични дела за кои е пропишана најмала казна од пет години затвор, како во овој случај.
