Гласањето за овој предлог не беше објавено во детали, но предлогот беше отфрлен, според извештајот на Коха.
Претседателот на Демократската партија Саљи Бериша остро ја критикуваше одлуката, наведувајќи дека Албанија „требаше веднаш да ја усвои резолуцијата од Приштина“.
„Во текот на 1998-1999 година, варварските српски сили извршија масакри врз незаштитеното население. Да се негира ова е да се биде без човечка, општествена и национална свест“, кажа Бериша од парламентарната клупа, обвинувајќи ја владејачката Социјалистичка партија за „газење врз жртвите на геноцидот“ и дека премиерот Еди Рама е „слуга на (српскиот претседател Александар) Вучиќ“.
Министерот за одбрана Пиро Венгу одговори дека „никој не може да дели лекции за патриотизам кога е Косово во прашање“, потсетувајќи дека Рама исто така „јавно го повтори барањето за признавање на Косово во Белград“, објави Коха.
Венгу повика на национално единство и истакна дека владата води „стратегиска соработка со Косово во развојот и безбедноста“.
Пратеникот од опозицијата Ералд Капри ја критикуваше владата за, како што изјави, „недостигот на кохерентност во односите со Косово“.
„Косово заслужува поинаков пристап и поголемо внимание од овој парламент, а не оваа тема да се користи за политичка реторика“, рече тој.
Социјалистот Уљси Мања се приклучи на дискусијата, нагласувајќи дека Рама е „адвокат на Косово“ на меѓународните форуми:
„На европските и меѓународните маси, тој бара од земјите од ЕУ да ја признаат независноста на Косово“, пренесува Коха.
Мања потврди дека пратениците на социјалистите ќе учествуваат на протестниот марш во Тирана во поддршка на УЧК, но „како граѓани, а не како политичари“.
Лидерот на Републиканската партија Фатмир Медиу објави дека ќе се придружи на протестниот марш во поддршка на учк, нагласувајќи дека оди „како граѓанин, а не како политичар“. Тауљант Бала, шеф на пратеничката група на социјалистите, потврди дека Рама нема да присуствува на настанот за да „не биде политизиран“.
Тирана се подготвува за масовен протест на сите Албанци закажан за денес во знак на солидарност со поранешните водачи на таканаречената Ослободителна војска на Косово (УЧК) на кои им се суди во Хаг.
Најавата за митингот, организиран од Здружението на воени ветерани на УЧК, предизвика политички тензии меѓу албанскиот премиер Еди Рама и Движењето Самоопределување, додека косовските институции, вклучително и претседателката Вјоса Османи, дадоа поддршка на протестот.
Самоопределување го оспорува организирањето на овој протест од страна на Рама, обвинувајќи го дека наводно го поддржувал Специјалниот суд во еден момент, додека Рама возвраќа дека жали што Самоопределување „ги меша институционалните односи на Косово и Албанија со вториот круг од локалните избори“.
