Во петминутната снимка, снимена за време на патувањето, Фицо го нападна претседателот на Европскиот совет Антонио Кошта за, како што кажа, „страшно скапата вечера во Брисел“, но и високата претставничка на Европската Унија за надворешна политика Каја Калас.
Тој особено го нагласи својот долгогодишен конфликт со Калас, кој започна откако таа јавно ја критикуваше неговата подготвеност да се сретне со рускиот претседател Владимир Путин и покрај руската агресија врз Украина.
THE SAME RULE APPLIES TO THE EU AS TO A MASSAGE PARLOR: IF IT DOESN’T WORK, IT’S NOT ENOUGH TO CHANGE THE BEDS — YOU HAVE TO CHANGE THE STAFF. pic.twitter.com/0injG6Dfcr
— Robert Fico 🇸🇰 (@RobertFicoSVK) January 22, 2026
Зборувајќи за моменталната криза во односите меѓу Европската Унија и Соединетите Американски Држави, Фицо тврди дека проблемот лежи токму во раководството на Унијата.
„Не можеме да имаме луѓе на водечките позиции во ЕУ со кои клучните глобални актери не се среќаваат и со кои практично воопшто не разговараат. Ако шефот на американската дипломатија Марко Рубио упорно одбива да се сретне со Каја Калас, а не пак да води конструктивен разговор со неа, тогаш која е воопшто целта на нејзината позиција?“, праша тој.
Во снимката тој истакна дека „единственото нешто што ја движи Европската Унија денес е омразата кон Русија“.
Словачкиот премиер верува дека ЕУ може да излезе од „длабоката криза“ само ако добие ново раководство. Тој ги обвини сегашните лидери дека немаат одговори на клучните прашања со кои се соочува Унијата, а потоа изговори реченица што особено ја нагласи.
„За ЕУ важи истото правило како и за салон за масажа: ако не функционира, не е доволно да се сменат креветите, мора да се смени и персоналот“, кажа Фицо. На крајот, тој додаде дека се надева дека состанокот во Брисел нема да трае до утрото бидејќи веќе имал закажан состанок за следниот ден во Париз.
