Фицо рече дека Словачка постигнала најмногу што можела во овој момент, откако постојано го блокирала усвојувањето на санкциите барајќи гаранции за штетата што Братислава ќе ја претрпи како резултат на санкциите, објави Ројтерс.
„Во овој момент, би било контрапродуктивно да се продолжи со блокирањето на 18-тиот пакет санкции утре“, рече Фицо во видеопорака објавена на Фејсбук.
Амбасадорите на ЕУ ќе се состанат утрово за да ги одобрат новите санкции, изјавија за Ројтерс неименувани дипломати од ЕУ.
Европската комисија минатиот месец предложи 18-ти пакет санкции против Русија поради нејзината инвазија на Украина во 2022 година, насочени кон приходите на Москва од енергијата, банките и воената индустрија.
Предложениот пакет вклучуваше ограничување на флуктуирачката цена на руската нафта од 15 проценти под просечната пазарна цена на суровата нафта во претходните три месеци, изјавија дипломати од ЕУ.
Со предлогот, исто така, би се забраниле трансакциите со рускиот гасовод „Северен тек“, како и банките вклучени во заобиколувањето на санкциите.
Словачка неколку пати стави вето на пакетот во обид да добие концесии во посебен план за постепено укинување на руската нафта и гас, за што, за разлика од санкциите, не е потребна едногласна поддршка од земјите на ЕУ.
Словачка продолжува да увезува руска енергија, вклучително и гас, според договор што важи до 2034 година.
Фицо во вторникот изјави дека Словачка добила гаранции од Комисијата за помош во случај на потенцијален недостиг од гас или зголемување на цените и транзитните такси, како и помош во спорови околу потенцијални барања за отштета од рускиот добавувач „Газпром“.
Комисијата во писмо до Словачка во вторникот рече дека ќе интервенира во потенцијални судски спорови и исто така ќе разјасни како би можела да се активира „вонредна пауза“ ако цените на гасот скокнат поради ограниченото снабдување за време на постепеното укинување на рускиот гас.
Брисел, исто така, ќе развие решение насочено кон намалување на трошоците за прекугранични тарифи за гас и нафта за Словачка, се вели во писмото.
Малта, исто така, претходно изрази резерви во врска со предложеното ограничување на цената на руската нафта, но владата на земјата соопшти дека денеска ќе ги поддржи новите санкции, изјавија дипломати од ЕУ за Ројтерс.
