Сирискиот министер за надворешни работи Асад ал-Шибани денеска е во посета на Вашингтон за разговори на Капитол Хил за трајно укинување на преостанатите санкции против Сирија, соопштија американски функционери.
Посетата се одвива во рамките на американски посреднички напори за постигнување нов безбедносен договор помеѓу Израел и Сирија.
Републиканскиот сенатор Линдзи Греам за Аксиос рекол дека очекува денеска да се сретне со Шибани заедно со неколку други сенатори за да разговараат за трајното укинување на „Цезаровите санкции“.
Цезаровиот закон за заштита на цивилите во Сирија е американски закон што стапи во сила во јуни 2020 година, именуван по сириски воен дезертер што пренел фотографии од жртвите на тортура. Санкциите беа насочени кон режимот на Асад и кон секој што води бизнис со него, особено во секторите како енергија, градежништво и финансии. Администрацијата на Трамп издаде привремени изземања од санкциите, но само Конгресот може да гласа за нивно укинување. Греам додаде дека за да го поддржи овој чекор, сака Сирија официјално да ѝ се приклучи на коалицијата против ИСИС и да се движи кон нов безбедносен договор со Израел.
В петок се очекува Шибани да се сретне со државниот секретар Марко Рубио.
Сирискиот министер за надворешни работи патува од Лондон, каде што имаше разговори со израелскиот министер за стратегиски прашања Рон Дермер за израелски предлог за нов безбедносен договор помеѓу двете земји. Шибани и Дермер се сретнале пет часа под покровителство на американскиот пратеник Том Барак за да ја разгледаат реакцијата на Сирија. Според извори запознаени со средбата, разговорите во Лондон покажале напредок кон можен договор.
Извор од сириската влада рекол за Ал Џезира дека Шибани нагласил пред Дермер дека регионалната безбедност може да се постигне само преку почитување на суверенитетот и независноста на Сирија. Сирискиот контрапредлог предвидува Израел да се повлече од областите што ги окупирал по падот на режимот на Асад во декември минатата година. Контрапредлогот предвидува и повторно распоредување на набљудувачка сила на ООН во заштитната зона помеѓу двете земји.
Сирискиот претседател Ахмад ал-Шараа изјави за новинарите во средата дека преговорите со Израел можат да донесат резултати во наредните денови. Тој рече дека администрацијата на Трамп не ја притиска Сирија да се согласи со условите на Израел. Новиот безбедносен договор е „неопходност“, истакна тој, но Израел ќе мора да го почитува воздушниот простор и територијалниот интегритет на Сирија.
Ал-Шараа рече дека договорот за безбедност може да отвори пат за дополнителни договори меѓу Израел и Сирија, но во моментов не е на маса договор за нормализација.
Последната ваква посета беше во декември 1999 година, кога тогашниот сириски министер за надворешни работи Фаруќ ал-Шараа ја посети Белата куќа за мировни преговори со Израел.
