„Пораката до Москва е јасна. Како сојузници, ние сме заедно. НАТО решително ќе ги брани нашите граници. Но во исто време, сакам да нагласам дека нема да дозволиме да бидеме вовлечени во ескалацијата на конфликтот. Силата на НАТО лежи и во тоа што останува ладнокрвно“, рече германскиот министер во интервју за полскиот весник „Газета Виборча“.
Вадефул, кој денес е во Варшава на состанок со полскиот и францускиот министер за надворешни работи во рамките на Вајмарскиот триаголник и на Варшавскиот безбедносен форум, во интервјуто ја предупреди Русија да престане со провокациите и лекомисленото ризикување ескалација на конфликтот, што никој не го сака.
„Оваа војна ќе заврши кога Путин ќе сфати дека се нашол во ќорсокак. Дури тогаш ќе биде подготвен за сериозни преговори“, рече германскиот министер, додавајќи дека безбедносните гаранции за Украина мора да бидат такви, а украинската армија вооружена до таков степен, што за неколку месеци или години нема повторно да се најдеме на местото каде што е сега конфликтот.
Полскиот министер за надворешни работи Радослав Сикорски, исто така, оцени дека војната во Украина ќе заврши само кога рускиот претседател Владимир Путин ќе сфати дека не е во можност да победи.
„Војната во Украина ќе заврши како Првата светска војна. Едната или другата страна ќе ги исцрпи потребните залихи за да ја продолжи. Ваквите колонијални војни траат околу 10 години. Тие завршуваат кога агресорот ќе признае дека не може да победи“, рече Сикорски во интервју за Си-ен-ен.
Полскиот министер потсети дека Путин ја започнал војната врз основа на погрешни проценки дека неговата „специјална операција“ ќе трае три дена, дека ќе го освои Киев и дека Украинците ќе го пречекаат со раширени раце, и сега не смее да си признае ниту себеси ниту на Русите дека грешел.
Министрите за надворешни работи на Франција, Германија и Полска денес учествуваат на дводневниот Варшавски безбедносен форум, каде што главна тема е одговорот на Европа на војната во Украина во контекст на сè почестите провокации и закани од Русија дека конфликтот би можел да ескалира.
Заедно со германскиот министер за надворешни работи, на форумот ќе присуствува и германскиот министер за одбрана Борис Писториус, САД се претставени од специјалниот претставник на американскиот претседател за Украина, Кит Келог, Украина е претставена од нејзиниот министер за надворешни работи Андриј Сибиха, а Европската Унија е претставена од европските комесари за одбрана и демократија и правда.
Варшавскиот безбедносен форум, исто така, го подготви својот традиционален годишен извештај, овој пат насловен како „Победа во војната без војна“, кој сугерира дека Европа и трансатлантските партнери треба порешително да ја поддржат Украина во нејзината одбрана од Русија.
На панел-дебатите на безбедносниот форум на 29 и 30 септември во Варшава ќе се најде и горливата тема за Блискиот Исток и Газа.
