„Кина и Соединетите Американски Држави некогаш се бореа рамо до рамо против фашизмот и милитаризмот, а сега треба да соработуваат за да ги заштитат резултатите од Втората светска војна“, ја цитира новинската агенција на Си. Претставник на Белата куќа потврди дека Трамп и Си разговарале по телефон, но не изнесе никакви детали од разговорот.
Кина го смета Тајван за дел од својата територија и не ја исклучува можноста за употреба на сила за да ја врати контролата врз островот, иако владата на одметнатиот остров го отфрла тврдењето на Пекинг и тврди дека само народот на Тајван може да одлучи за својата иднина.
Кина е вовлечена во најголемата дипломатска криза со Јапонија во повеќе од 10 години откако јапонскиот премиер Санае Такаичи овој месец изјави дека евентуален кинески напад врз Тајван би можел да предизвика воен одговор од Токио.
Си и Трамп се сретнаа во Јужна Кореја на 30 октомври по неколкуте месеци трговски тензии предизвикани од царинските политики на Трамп. Оттогаш Кина продолжи да купува американска соја и го запре проширувањето на своите ограничувања за извоз на ретки минерали, додека САД ги намалија царините за кинеските стоки.
Си изјави дека кинеско-американските односи се стабилизирале и подобриле по нивната средба. „Фактите уште еднаш покажуваат дека двете страни имаат корист од соработката, а дека конфликтот им штети и на двете“, му рече тој на Трамп, повикувајќи ги двете земји да одржат позитивен моментум и да ја прошират соработката.
Двајцата лидери разговараа и за војната во Украина, при што Си ја повтори поддршката на Кина за сите напори за мир и ги повика сите страни да ги решат недоразбирањата.
