„Повеќе офицери на шведските оружени сили пристигнуваат денес во Гренланд“, напиша Кристерсон во објава на социјалните мрежи. „Тие се дел на група од повеќе сојузнички земји. Заедно ќе се подготвуваат за претстојните активности како дел од данската воена вежба „Операција Арктичка издржливост“.
Пристигнувањето на шведските офицери е дел од поширок процес на зајакнување на военото присуство на Гренланд и неговата околина. Данска и Гренланд и претходно објавија дека, во соработка со своите сојузници, ја зголемуваат воената подготвеност во таа стратегиски исклучително важна арктичка област.
Шведските офицери ќе бидат вклучени во активности заедно со членови на други сојузници, како дел од данската вежба „Операција Арктичка издржливост“, чија цел е да се тестира способноста за дејствување во екстремни арктички услови и да се зајакне координацијата меѓу партнерските држави.
Овој потег доаѓа во време кога американскиот претседател Доналд Трамп повторно ја заостри својата реторика кон Гренланд, отворено доведувајќи го во прашање статусот на таа територија и американските интереси на Арктикот. Во неколку наврати во последните месеци, Трамп зборуваше за „стратегиската важност на Гренланд за безбедноста на САД“, притоа не исклучувајќи го политичкиот или економскиот притисок врз Данска.
Ваквите изјави предизвикаа загриженост во Копенхаген и кај европските сојузници, кои го сметаат Гренланд за составен дел од Кралството Данска и клучен елемент на европската безбедносна архитектура на Арктикот. Во овој контекст треба да се гледа одлуката за дополнително воено вклучување на сојузниците, вклучително и Шведска.
Во последниве години Арктикот стана сè поважна геополитичка област, поради климатските промени, новите пловни правци и богатите природни ресурси. Заедно со САД, Русија и Кина, европските земји исто така се обидуваат да го зајакнат своето присуство и соработка со цел да спречат дестабилизација на регионот.
