Научници од Универзитетот Рутгерс во САД пред неколку години спроведоа анализа на можните последици од нуклеарна војна меѓу Индија и Пакистан, предупредувајќи дека таквиот конфликт би можел да има катастрофални последици не само за двете земји, туку и за целиот свет.
Истражувачкиот тим детално опишува како би можела да започне таква војна, колку човечки жртви би предизвикала и какви би биле пошироките климатски последици.
Процените покажуваат дека, во зависност од јачината на оружјето – од 15 до 100 килотони – бројот на жртвите би можел да достигне помеѓу 50 и 125 милиони луѓе. Покрај огромниот број мртви, на милионите ранети ќе им биде потребна итна помош, додека многу градови во Индија и Пакистан ќе бидат уништени и ќе станат непогодни за живеење.
Уништената инфраструктура, од електричната мрежа до транспортните системи и банкарскиот сектор, дополнително би го парализирала општеството.
Овој ефект, познат како „нуклеарна зима“, би резултирал со пад на температурите низ целиот свет, намалени врнежи и сериозни нарушувања во глобалното земјоделство. Со други зборови, дури и земјите што не би биле директно погодени од нуклеарните напади би можеле да доживеат глад, економски шокови и политичка нестабилност.
Научниците истакнуваат дека последиците од регионалниот нуклеарен конфликт би биле долгорочни и планетарни. Таквата војна нема да остане „нивен проблем“ – во свет каде што климата е поврзана, а глобалната трговија е кревка, нуклеарната војна меѓу Индија и Пакистан би можела да предизвика криза каква што човештвото никогаш не доживеало.
