Доколку биде усвоен, Шпанија ќе стане втората земја во светот што уставно го гарантира правото на абортус, откако Франција го стори тоа минатата година.
Оваа година Шпанија одбележува четири децении откако абортусот повеќе не е кривично дело.
„Со оваа влада нема да има назадување кога станува збор за социјалните права“, напиша Санчез на социјалната мрежа Икс.
Коалициската влада на социјалистите и тврдокорната левица дополнително ги зајакнува прогресивните и феминистичките политики за да го мобилизира својот електорат, додека анкетите покажуваат пораст на поддршката за крајно десничарската партија Вокс.
Реформата бара поддршка од три петтини од долниот дом на парламентот, што значи дека ќе биде потребна и поддршка од пратениците од редовите на конзервативната опозициска Народна партија (ПП).
Владата сака да го промени и законот за абортус за да ги спречи жените кои сакаат да ја прекинат бременоста да добиваат лажни информации кои може да влијаат на нивната одлука.
Според соопштението од канцеларијата на премиерот Санчез, изменетиот закон ќе ги обврзе здравствените власти да им обезбедат на жените информации за абортус само врз основа на објективни научни докази, во согласност со стандардите на институции како што се Светската здравствена организација или Американската психијатриска асоцијација.
Овој потег доаѓа откако Градскиот совет на Мадрид претходно оваа недела донесе мерка со која ги обврзува здравствените служби да ги информираат жените кои размислуваат за абортус за таканаречениот „синдром по абортус“.
Мерката беше предложена и усвоена од десничарските, конзервативни партии.
Според тврдењата на партијата Вокс, синдромот, чие постоење нема научен консензус, наводно води до употреба на алкохол и дрога, самоубиствени мисли или дури и рак на женскиот репродуктивен систем.
Заговорниците на репродуктивните права велат дека глобалните напори за ограничување на репродуктивните слободи на жените се интензивирале откако Врховниот суд на Соединетите Американски Држави во 2022 година ја поништи пресудата Ро против Вејд од 1973 година со која се признаваше уставното право на абортус.
