„Воените маневри Запад, иако се одржуваат редовно, се закана затоа што таму се вежба многу агресивно сценарио. Белорусија го нарушува полскиот воздушен простор. Затворањето на границата затоа е сугестија до претседателот Лукашенко дека отишол предалеку“, кажа Шикорски во интервју за полската приватна телевизија ТВН24.
Полскиот министер потсети дека 500 години историја ги научиле Полјаците дека кога Русија им се заканува, тие тоа го сфаќаат тоа смртно сериозно.
„Пред Русија да ја нападне Грузија, имаше вежби. Пред да ја нападне Украина, вежбаше. Сега вежба инвазија на НАТО, а со тоа и употреба на нуклеарно оружје. Научивме за 500 години дека кога Русија ни се заканува, за жал мора да го сфатиме тоа смртно сериозно“, оцени Шикорски.
Во врска со различните анализи дека Русија ќе биде подготвена да нападне една од членките на НАТО веќе во 2027 година, Шикорски кажа дека, иако Русија не успеа да го освои Донбас во Украина во текот на 10-годишните напори, за жал знае како ефикасно да користи беспилотни летала и ракети.
„Различни разузнавачки агенции имаат различни проценки за тоа кога Русија ќе биде подготвена и кога ќе биде потребно да нападне. Досега, не е во можност да го освои Донбас дури ни по 10 години. Сепак, изгради воена индустрија и капацитети за беспилотни летала. А нејзините ракети се, за жал, ефикасни, како што можеме да видиме од нападите врз Киев и другите украински градови“, кажа Шикорски.
Полскиот министер за надворешни работи потврди дека полската Агенција за внатрешна безбедност уапсила белоруски агент во понеделникот во соработка со разузнавачките служби на Романија и Чешка, и дека Полска протерува белоруски дипломат.
„Односите со Белорусија не се добри затоа што Белорусија хибридно ја напаѓа нашата граница обидувајќи се да ги принуди мигрантите да влезат во Полска и Европската Унија. Тоа нè чини“, рече Шикорски.
Полска одлучи да ја затвори границата со Белорусија на неодредено време поради редовните воени вежби Запад во Белорусија од 12 до 16 септември, кога руски и белоруски војници на границата со Полска ќе симулираат напад врз коридорот Сувалки кој ги поврзува Литванија и Полска и ќе вежбаат употреба на нуклеарно оружје.
Полските власти објавија дека границата ќе биде затворена на полноќ на 11 септември, а премините ќе бидат отворени и железничкиот сообраќај ќе биде повторно отворен кога повеќе нема да има никаква закана за Полјаците.
