„Апсолутно сум убеден дека САД му се целосно посветени на НАТО. Нема никакво сомневање во тоа. Се зголемија и очекувањата. Навистина, ние сакаме да трошиме повеќе, Европа ќе преземе поголема одговорност“, рече Руте. Но, на крајот, станува збор за тоа сè да се направи заедно со САД, додаде тој.
Поранешниот холандски премиер го истакна самитот на НАТО во Хаг во јуни, на кој сите сојузници се договорија за зголемување на одбранбените трошоци на 5 отсто од бруто-домашниот производ (БДП) до 2035 година. „Мислам дека тоа и натаму е една од најголемите надворешнополитички победи на претседателот Трамп – тие 5 проценти, јасна посветеност на поголемо производство“, рече Руте.
Манфред Вебер, лидер на конзервативната Европска народна партија (ЕПП), најголемата група во Европскиот парламент, ја повика ЕУ да се развие во „европско НАТО“, тврдејќи дека на САД повеќе не може неограничено да се смета. Со должно почитување кон Вебер, Руте рече дека има поинакво мислење.
„Да не заборавиме дека, кога станува збор за Европа и НАТО, не се работи само за Европската Унија“, истакна Руте. Признавајќи ја важноста на ЕУ, тој напомена дека 23 земји-членки на ЕУ во рамките на НАТО сочинуваат само околу една четвртина од вкупниот економски потенцијал на алијансата.
„Седумдесет и пет отсто е сè уште надвор од ЕУ“, рече Руте, мислејќи на членки на НАТО како Обединетото Кралство, Норвешка, Канада и Соединетите Американски Држави.
