Рамковниот договор од 20 точки на американскиот претседател Доналд Трамп, кој Израел веќе го прифати, предвидува разоружување на Хамас и укинување на секоја идна улога на таа група во управувањето со Газа.
Дел од политичкото раководство на Хамас со седиште во Катар наводно е отворен за прифаќање на планот со одредени прилагодувања. Сепак, нивното влијание е ограничено бидејќи немаат контрола врз заложниците кои ги држи военото крило. Се проценува дека остануваат 48 заложници, од кои се верува дека само 20 се живи.
Една од главните пречки за Хамас е барањето сите заложници да бидат предадени во првите 72 часа од примирјето, со што би се откажал од нивниот единствен адут за преговарање. Во групата постои длабока недоверба кон Израел, дури и со уверенијата на Трамп дека ќе ги почитува условите. Тие се плашат дека Израел ќе ги продолжи воените операции штом заложниците бидат ослободени, особено по нападот врз раководството на Хамас во Доха минатиот месец, со кој Израел им пркосеше и на САД.
Некои лидери на Хамас, исто така, се спротивставуваат на распоредувањето „привремени меѓународни сили за стабилизација“ во Газа, кои ги планираат САД и арапските држави, бидејќи го гледаат тоа како нова форма на окупација.
Друга спорна точка е мапата на постепеното повлекување на израелските трупи која ја сподели администрацијата на Трамп, која покажува таканаречена „безбедносна тампон зона“ по границите на Газа со Египет и Израел. Не е јасно кој би управувал со таа зона, но израелското вклучување би било неприфатливо за Хамас.
Од друга страна, израелскиот премиер Бенјамин Нетанјаху се чини дека се спротивставува на неколку клучни услови од планот за кој се согласи во понеделникот. Во видео објавено на социјалната мрежа Икс, тој инсистира дека израелската армија ќе може да остане во делови од Газа и дека Израел „силно ќе се спротивстави“ на воспоставувањето палестинска држава.
Овие изјави се спротивни на американската рамка, која предвидува целосно повлекување на израелските сили, „освен безбедносно присуство на периметарот кое ќе остане сè додека Газа не биде соодветно обезбедена од каква било обновена терористичка закана“. Планот, исто така, наведува дека по неговото спроведување, би можел да се отвори „кредибилен пат кон палестинско самоопределување и државност“.
Хамас претходно соопшти дека нема да се разоружи сè додека не се воспостави суверена палестинска држава. Израелската воена кампања во Газа почна како одговор на упадот на Хамас во јужен Израел на 7 октомври 2023 година, во кој загинаа околу 1.200 луѓе, а 251 лице беа киднапирани. Оттогаш, во израелските сили убија најмалку 66.225 луѓе, главно цивили.
