Иако не кажа директно што мисли, аналитичарите го протолкуваа тоа како најава за понатамошни чекори кон реформа на системот за донесување одлуки во рамките на Европската Унија, кој се базира на принципот на едногласност. Мерц веројатно имал на ум и други можни „нарушувачи“, како што се словачкиот премиер Роберт Фицо или неговиот чешки колега Андреј Бабиш, кои, особено кога станува збор за надворешнополитички одлуки во врска со војната во Украина, често излегуваат со идеи кои се спротивни на оние кои ги поддржува мнозинство членки.
Сега партискиот колега на Мерц и министер за надворешни работи Јохан Вадефул повторно ја воведе идејата за укинување на принципот на едногласност, барем кога станува збор за надворешната и безбедносната политика на ЕУ.
„За да стане ефективен фактор на меѓународно ниво и навистина зрела, ЕУ ќе мора да го укине принципот на едногласност за безбедносни и надворешнополитички прашања, и тоа во овој изборен период“, кажа Вадефул во интервју за медиумската група Функе.
Германскиот министер за надворешни работи не го крие развојот на настаните кои го навеле да ја зајакне својата позиција по ова прашање. „Јас сум за работа со систем на квалификувано мнозинство во Европската Унија. Сите искуства што ги имавме во последните неколку недели во врска со помошта за Украина и санкциите против Русија зборуваат во прилог на тоа“, додаде Вадефул.
Унгарија во моментов го блокира заемот на Европската Унија од 90 милијарди евра за Украина. Орбан ја обвинува Украина дека го спречува продолжувањето на испораките на руска нафта преку нафтоводот Дружба за да влијае врз унгарските избори. Киев тврди дека нафтоводот бил оштетен во руски напад, без да понуди докази.
Зборувајќи за парламентарните избори во Унгарија на 12 април, Вадефул кажа: „Граѓаните на Унгарија демократски ќе одлучат сами каква влада сакаат. И ние мораме и сакаме да соработуваме со секоја унгарска влада“.
