„Да бидеме јасни, освен техничките детали на процесот, постои темелна политичка одлука што треба да се донесе: избор меѓу останување заробени во минатото или движење напред кон заедничка иднина во Европската Унија, избор меѓу поделба или помирување и соработка, што се самите столбови на Европската Унија“, рече Кошта во соопштението објавено по самитот.
Тој рече дека процесот на проширување се движи побрзо отколку во последните 15 години и дека таа можност треба да се искористи. Посочи дека проширувањето е процес заснован на заслуги, а не трка или натпревар меѓу земјите кандидатки.
„Оние што се движат побрзо не треба да бидат кочени од оние што се побавни. Напротив, тие треба да го одредуваат темпото и да бидат инспирација за сите“, рече Кошта.
Претседателката на Европската комисија, Урсула фон дер Лаен, изјави дека „првпат по повеќе од 10 години, проширувањето стана реална можност“. Таа го пофали „импресивниот напредок“ на Црна Гора и Албанија, кои станале извор на инспирација за останатите земји од Западен Балкан.
Претседателот на Европскиот совет во својата изјава ги спомена сите земји од Западен Балкан, освен Србија, чиј претседател Александар Вучиќ одби да присуствува на самитот.
Кошта го истакна брзиот напредок на Црна Гора и Албанија и изрази надеж дека Македонија ќе напредува следната година. Во однос на Босна и Херцеговина, Кошта рече дека таа земја годинава усвоила реформска агенда, што е неопходен чекор за пристапување кон Планот за раст и што ќе ѝ овозможи да го искористи целосниот потенцијал на поддршката од Европската Унија и постепената интеграција.
Кошта ги поздрави чекорите што Косово ги презело во градењето доверба меѓу заедниците, нагласувајќи дека претстојните парламентарни избори ќе бидат клучен момент за консолидирање на реформите и конструктивен ангажман во европските интеграции.
