Севернокорејскиот лидер Ким Џонг Ун го следел тестирањето на унапреден мотор на цврсто гориво со силен потисок, во рамките на развојот на стратегискиот арсенал на земјата, јавија државните медиуми.
Моторите на цврсто гориво обезбедуваат висока погонска моќ и овозможуваат побрза процедура на лансирање. Според експертите, овој мотор е наменет за опремување на новите интерконтинентални балистички ракети хвасонг-20, претставени во октомври минатата година, кои би можеле да стигнат до копното на САД.
Тестот е во согласност со целта на Ким за развој на поагилни ракети што потешко се детектираат насочени кон САД и нивните сојузници, но дел од експертите предупредуваат дека Пјонгјанг можеби ги преувеличува своите способности.
Севернокорејската Централна новинска агенција (КЦНА) објави дека Ким го следел тестот на моторот, при што максималниот потисок достигнал 2.500 килотони, што е значително повеќе од 1.970-те килотони пријавени при слично тестирање во септември.
Тестирањето било дел од петгодишниот план за развој на оружје насочено кон подобрување на „стратегиските ударни средства“, термин што се однесува на балистички ракети со нуклеарни можности и друго оружје.
Ким изјавил дека најновото тестирање има големо значење за подигнување на стратегиската воена моќ на земјата на највисоко ниво. КЦНА не наведе кога и каде е извршено тестирањето.
Некои експерти сметаат дека извештајот може да биде и „блеф“, бидејќи не се објавени клучни податоци, како времетраењето на согорувањето на моторот.
Севернокорејските нуклеарни и ракетни програми се под санкции на Обединетите нации, додека Пјонгјанг ги оправдува со, како што тврди, заканите од САД и нивните сојузници.
