„Рекоа дека е невозможно да се окончаат, ‘никогаш нема да ги решиш’. Некои траеја 31 година, една 36, друга 28 години. Јас окончав седум војни. Ова беа војни со илјадници смртни случаи. Тоа ги вклучува Камбоџа и Тајланд, Косово и Србија, ДР Конго и Руанда – тоа беше насилна војна, Пакистан и Индија, Израел и Иран, Египет и Етиопија, и Ерменија и Азербејџан. Ниеден претседател или премиер, ниедна друга земја не постигнала ништо блиску до тоа, а јас го постигнав тоа за само седум месеци. Штета е што морав јас да го направам тоа, наместо Обединетите нации да го сторат тоа, тие дури и не се обидоа да помогнат во ниту една од нив“, рече Трамп.
Тој повеќе пати во јавни настапи, но не и вчера, кога зборуваше за Азербејџан и Ерменија, рече дека го спречил конфликтот меѓу „Абербајџан“ и Албанија.
Стејт департментот на својот официјален профил на Икс напиша дека Трамп, кого го нарекоа „претседател на мирот“, завршил седум војни за само седум месеци: „Камбоџа и Тајланд, Косово и Србија, ДР Конго и Руанда, Пакистан и Индија, Израел и Иран, Египет и Етиопија, Ерменија и Азербејџан“.
“THE PRESIDENT OF PEACE: 7 wars ended in 7 months.” — @POTUS pic.twitter.com/eNA0yAdlc2
— Department of State (@StateDept) September 23, 2025
На 27 јуни Трамп тврдеше дека спречил избувнување на непријателства меѓу Србија и Косово.
„Србија и Косово ќе се судрат, тоа ќе биде голема војна. Им реков: ‘Пробајте, но тогаш нема да има трговија со САД’. Потоа тие одговорија: ‘Па, можеби нема ни да влеземе во тоа (во конфликтот)’“, рече Трамп во тоа време.
Двете земји се во спор долго време, а во последните години тензиите растат.
Косово во 2008 година еднострано прогласи независност, која Србија не ја признава и ја смета за дел од својата територија.
Двете земји во 2020 година потпишаа договори за економска нормализација во Овалната соба со Трамп, но во тоа време не беа во војна.
Неколку земји, вклучувајќи ги Израел, Пакистан и Камбоџа, го номинираа Трамп за Нобелова награда за мир за неговото посредување во мировни договори или прекини на огнот. Самиот Трамп изјави дека ја заслужува норвешката награда, која им е доделена на четворица негови претходници во Белата куќа.
Францускиот претседател Емануел Макрон вчера изјави дека ако Трамп навистина сака да ја освои наградата, мора да ја запре војната во Газа.
