Зборувајќи денеска со новинарите во Ханој, Макрон директно се осврна на снимката, отфрлајќи ги шпекулациите што ги предизвика.
„Има некое видео на кое се гледа како се шегувам и ја задевам сопругата и некако тоа станува еден вид геопланетарна катастрофа, при што луѓето дури и смислуваат теории за да го објаснат тоа“, рече францускиот претседател, пренесе Си-ен-ен.
Макрон призна дека снимката е вистинска, но го критикуваше начинот на кој била претворена во оружје. „Сите видеа се вистински и да, понекогаш луѓето ги менуваат, но луѓето им додаваат секакви глупости.“
На краткиот клип се гледа како се отвора вратата на авионот и се појавува Макрон. Неколку секунди подоцна, се гледаат двете раце на Брижит Макрон како го притискаат лицето на претседателот, што изгледа како ненадејно удирање.
Макрон за момент се чини изненаден, но брзо се прибира и им мавта на новинарите што стојат надвор.
Додека двојката се симнува по скалите, Макрон ѝ ја подава раката на Брижит, која таа не ја прифаќа, туку се држи за оградата.
Елисејската палата првично го негираше инцидентот во авионот, а подоцна почна да го намалува неговото значење.
Двојката само се расправаше, изјави извор близок до претседателот за БФМ ТВ, филијалата на Си-ен-ен. Тоа беше „момент на заедништво“, според извор од Елисејската палата.
„Тоа беше момент кога претседателот и неговата сопруга имаа последна шанса опуштено да се забавуваат пред почетокот на посетата, игриво задевајќи се еден со друг“, рекол изворот за Си-ен-ен.
„Не требаше многу за да се нахранат водениците на теоретичарите на заговор“, додал изворот, велејќи дека проруските тролови брзо го претвориле моментот во контроверзија, вели Си-ен-ен.
