Новата Национална полициска служба (НПС) ќе биде основана во Англија и Велс и ќе се занимава со кривични дела кои ги преминуваат локалните граници, како што се тероризмот, измамата и организираниот криминал. Точниот датум на почеток на работата сè уште не е објавен, пишува Скај њуз.
Новата служба ќе биде задолжена и за набавка на нова технологија и опрема за сите полициски сили, вклучително и воведување системи за препознавање лица на национално ниво. Оваа технологија ѝ овозможила на Лондонската метрополитенска полиција да уапси повеќе од 1.700 осомничени во последните две години.
Националната криминална агенција, антитерористичката полиција, регионалните единици за борба против организираниот криминал и националната сообраќајна полиција ќе бидат обединети под покровителство на НПС. Новата служба ќе ја води национален полициски комесар, кој со тоа ќе стане највисок полициски службеник во земјата.
Министерката за внатрешни работи Шабана Махмуд порача дека „постоечкиот полициски модел е создаден за некој друг век“. „На некои локални полициски сили им недостасуваат вештини или ресурси за борба против сложениот современ криминал, како што се измама, злоупотреба на деца преку интернет или групи на организиран криминал“, кажа таа.
„Ќе формираме нова Национална полициска служба, таканаречена британска ФБИ, со врвни експерти и најсовремена технологија за лоцирање и фаќање на опасни криминалци. Ова ќе им даде на локалните полициски сили повеќе време за борба против криминалот во нивните заедници“, додаде таа.
Една од главните цели на реформата е да им се овозможи на локалните полициски сили да се фокусираат повеќе на кривични дела како што се кражби во продавници, трговија со дрога, кражба на мобилни телефони и антисоцијално однесување.
Министерството за внатрешни работи изјави дека Националната полициска служба ќе обезбеди граѓаните да добијат исто ниво на полициска служба без оглед на тоа каде живеат. Новата служба, исто така, ќе постави унифицирани професионални стандарди и услови за обука на полициските службеници, така што сите полициски службеници во земјата ќе подлежат на истите правила.
Со цел да се зголеми одговорноста кон јавноста, ќе се воведат нови цели за локалните полициски сили, вклучувајќи време на одговор, задоволство на жртвите, јавна доверба и нивоа на безбедност. Овие податоци ќе бидат објавени, а полициските сили ќе бидат оценети за споредба.
Со оглед на тоа што полициските овластувања во Шкотска и Северна Ирска се децентрализирани, НПС ќе работи исклучиво во Англија и Велс.
